Lezetxikin AHTren obrek egindako kalteen inguruko eskandaluak erreakzioak sortzen jarraitzen du. Gipuzkoako Foru Aldundiak, Adifek eta Eusko Jaurlaritzak berehala gezurtatu zuten asteazkenean hondamenaren berri jakin zenean historiaurreko aztarnategia kaltetua izan denik, eta lur-jauzia "distantzia askora" izan dela ziurtatu zuen AHTko lanak gainbegiratzeaz arduratzen den Mertxe Urteaga aldundiko arkeologoak.

Euskadi Irratian Eider Mendoza Gipuzkoako Aldundiko bozeramaileari gai horretaz galdetu diote eta ezin izan du zehaztu babes eremutik zenbat metrotara izan diren kalteak, baina "babestutako leku horretan ez dago inolako kalterik, hori da azpimarratu behar duguna", esan du.

Hala ere, hainbat alderdik azalpenak eskatuko dituzte, besteak beste EH Bilduk, Elkarrekin Gipuzkoak eta Debagoieneko Ezker Anitza-IUk. Garagartza Auzoko Batzordeak ere salatu du haitzuloaren galeria bat suntsitu izana, eta Ekologistak Martxanek nabarmendu du haitzuloari egindako "hondatze larria" Adifek aurkeztutako Ingurumen Inpaktuaren Azterlan "urriaren" eta horren aurrean Eusko Jaurlaritzak izandako "utzikeriaren" ondorio ere badela.

Arrasateko udal gobernuak ostegun goizean bilera egin du hainbat erakunde eta elkarteren ordezkari eta adituekin, baita Alvaro Arrizabalaga arkeologo eta aztarnategiko zuzendari ohiarekin ere. Adierazpena egin du publiko udal gobernuak eta Adifi azalpenak eskatuko dizkiola jakinarazi du.

Planimetriak ez datoz bat

Udalak azaldu duenez Lezetxiki eta Leibar karstaren eremuan eragin du lur-jauzia AHTren tunelak, baina esku artean dituen planimetrien arabera, trenbidearen trazatua karstetik "urrun" egon behar luke "eta ez alboan, komunikabideetan agertzen diren argazkietan bezala". Horregatik, plano eguneratuak ere eskatuko dizkio Adifi.

Gainera, jakin nahi du kalteak izan diren eremuan kontrol arkeologikorik eta ondare-peritutzarik egin ote den, eta txosten arkeologikoaren kopia bat eskatuko du.

Arrasateko udal gobernuak gogorarazi du Lezetxiki eta Leibar eremu osoa babes arkeologikoa duen mendi bezala izendaturik dagoela udal planemanduan eta bere "asaldura eta ardura" azaldu du gertatutakoarekin.