Gipuzkoako Foru Aldundiak lotunea Ezkio-Itsason egitea defendatu du, ingurumen kalteei-eta erreparatu gabe, Donostiatik Iruñera heltzeko Gasteiztik pasa beharra "alferrikakotzat" jotzen duelako, eta, baita ere jakina, Ezkio-Itsason aspalditxotik eraikita dutelako sekula erabili gabeko geltokia. Arabako Foru Aldundiarentzat, baina, interesgarria litzateke Donostiaren, Bilboren eta Gasteizen arteko korapiloa Araban egitea, hain zuzen ere Gasteizen. EAJren aginteko bi erakundeen ika-mikaren erdian, EAJren Eusko Jaurlaritzak eskuak garbitu eta pilota Espainiako Gobernuaren teilatura jaurti izan du hainbatetan. 

Espainiako Gobernuak urtebete inguru darama ulertarazten AHTren Ezkio-Itsasoko loturak "arazoak" dituela, "konplexutasun teknikoak eta denborazkoak" esaterako. Azkenean, hitzez adierazi dute Ezkiokoa ez dela "bideragarria", eta Gasteizkoaren alde egin dute. Iazko urtearen amaieran iradoki zuten "hirugarren alternatiba bat" aztertzen hasi zirela, "Aralarri hainbeste kalte ez egiteko". Orain aurkeztu du asmoa Espainiako Garraio arloko Estatu idazkari Jose Antonio Santano irundarrak: hirugarren aukerak Aralar "inguratuko" luke, eta ia Altsasu pareraino joango litzateke. 

"Ez dago alde nabarmenik"

Desadostasuna adierazi dute, besteak beste, Stop Zundaketak - AHTrik EZ ekimenak eta Eguzkik. Izan ere, haien kalkuluen esanetan, Aralarri egingo litzaiokeen "eraso ekologikoa" antzekoa izango da, "22,5 kilometroko tunela beharrean, 20 kilometrokoa". Manipulazioa salatu dute.

Santano Garraio idazkariak iragarri du zulaketak egingo direla orain Ezkioko hirugarren aukera hori aztertzeko, eta gero, udaberrirako informazioa biltzean, erabakia hartzeko. Protesta egin duten mugimenduek tokiko udalei eta lur jabeei egiten dei, ez dezaten "inolako baimenik eman zundaketetan laguntzeko".