Azken asteetan Altsasuko auzia deskribatzen duen María Goiricelayaren Altsasu antzezlanaren aurkako kanpaina gogorra egin du Voxek, eta haren debekua eskatu du, ETAren biktimak eta Guardia Zibilaren duintasuna defendatu beharra aipatuta.

Voxek elkarretaratzea egin du La Abadia antzokian antzezlana eskaini den orduan. 450 bat pertsona bildu dira Gobernu Ordezkaritzaren esanetan. Bertan, Madrilgo Udaleko Voxeko Javier Ortega Smith zinegotziak gogor kritikatu du antzezlana: “Espainiako Konstituzioak adierazpen askatasuna babesten du, baina mugekin: ETA talde terroristak 230 hil zituen [Madrilen] eta erantzuten zaigu hau adierazpen askatasuna dela. Hori eufemismoa da, hipokrisia”.

Voxeko elkarretaratzearen aurrean, adierazpen askatasuna aldarrikatu du beste herritar talde batek Podemosek deituta. Voxek kritika gogorra egin die Madrilgo gobernu autonomoari eta udalari. PPko agintariek erantzun dute antzezlana gustukoagoa izan ala ez, La Abadia antzokiak bere programa egiteko eskubidea duela.

195 pertsonarentzako lekua duen aretoa beteta egon da eta antzezlana hasi aurretik publikoak lau minutuko txaloaldia eskaini die lau aktoreei, InfoLibre-ko kronikan irakurri ahal izan denez. Bertan azaltzen da, halaber, Juan Mayorga La abadia antzokiko zuzendariak esker oneko hitzak zuzendu dizkiola publikoari azken egunotan izandako zurrunbiloaren ondoren lana ikustera joan delako: “Antzokia bakea eta askatasunerako lekua da”. Kronistaren arabera, lana amaitzean ikus-entzule askok aipatu du “lana oso ona” dela, eta ondo ikusten dela “bi aldeetako sufrimendua”.