Al-Qiq  2015eko azaroaren 21ean eraman zuten atxilo eta azaroaren 25ean ekin zion protestari. Hamasekin lotura duelakoan atxilotu zuten, baina bere aurkako kargu zehatzik izan gabe. “Askatasuna berreskuratu ala hil”, adierazi zion kazetariak prentsari lehen egunetan.

Al-Qiq ez dute berehalakoan askatuko, Afulako (Israel) erietxean egon beharko du maiatzaren 21era arte; bertan artatuko dute. Kazetariaren protestak eragina izan du bere osasunean eta Israelgo osasun alorreko iturriek onartu dute ez dakitela lehengo egoerara itzultzeko gai izango den. Palestinako diplomazia iturriek baieztatu dutenez, begi bateko ikusmena galdu du 33 urteko kazetariak, entzumena kaltetua du eta ez da hitz egiteko gai; 30 kilogramo pisatzen du.

Gose greban zegoen bitartean, Ramalako erietxe batera –Palestinako administrazio hiriburura– joatea eskatu zuen kazetariak; eskaerak ez zuen aurrera egin. Israelek Jerusalen ekialdera –lurralde okupatura– joatea proposatu zion, baina kazetariak ukatu egin zuen proposamena.

Mohammad Barakeh politikari arabiar-israeldarrak adierazi du gose greba “garaipen” batekin amaitu duela preso palestinarrak. Protestak iraun bitartean, asko izan dira al-Qiq aske uzteko eskaerak. Kazetariaren aurkako karguak aurkeztea edo bestela, berehala askatzeko exijitu zion Palestinari laguntzeko NBEren taldeko koordinatzaile Robert Piperek Israelgo Gobernuari.

Atxiloketa administratiboaren figura erabili dute al-Qiq atxilo mantentzeko. Neurri horrekin, nahi zutenera arte izan zezaketen preso atxilotua, karguak aurkeztu edo prozesu judizial bati ekin beharrik izan gabe. Egun 660 preso palestinar inguru –tartean adin txikikoak– daude atxiloketa administratiboaren figurapean. Giza eskubideen aldeko elkarteek gogor salatu dute neurria.