Eritasun infekziosoetan erreferentzia errespetatua den Oriol Mitjà ikerlari ezagunak ohartarazi du Espainian dagoeneko 560.000 pertsona egon daitezkeela Covid-19z kutsatuta. Horrek azalduko luke zergatik erakusten duen izurriak hain hilkortasun tasa handia Espainian. Twitterrez zabaldutako txio kate batean dioenez, Alemaniak dauzkan kasu guztien %69 testeatu dituela kalkulatu dute eta, aldiz, Espainiak %5 baino ez. Horregatik, esatea Espainian birusak %6ko hilkortasuna duela gain-estimazio bat da, "positibo errealen proportzio oso txiki bat baizik ez baita diagnostikatu. Kasu errealen kopurua izugarria da, milioi erditik gorakoa".

"Herrialde batzuek beste batzuek baino hobeto jokatu dute Covid-19aren kontra" tituluz abiatu duen txio hari batean, Oriol Mitjàk esan du: "Alemania oso ondo aritu da. Kasu errealen totala apala da han goiz hasi zirelako probak egiten sintoma arinak dauzkaten pertsonei eta horrela frenatu zuten zabaltzea. Heriotza kopurua da benetako kutsatuen %0,3, Espainikoaren berdintsua, benetakoen %0,3 (...)  Egon naiteke oker, baina nik dauzkadan datuen arabera alemanak astero 160.000 proba ari ziren egiten sintomak zeuzkaten gaixo guztiei (horren aldean 15.000 Espainian, orain horiek bider 10 biderkatu ditugu".

Konfinamendu neurriak zorroztea eskatzen du Mitjàk izurria frenatu ahal izateko.

Oriol Mitjà ez da, noski, munduko aditu nagusi eta bakarra baina sinesgarritasun handia lortu du gaztea izanagatik. Eritasun infekziosoei aurre egiteko bide berriak irekiak ditu bai laborategian eta laborategietatik urrun, hau gerra balitz "fronteko lehen lerroan". Pian eritasuna bezalako etsaiei arrakastaz aurre egitea lortu duela esango genuke, Papuan, esaterako. Nazio Batuen Erakundeak saritua du eta 2016an Kataluniako Generalitateak Català de l'Any (Aurtengo Katalandarra) dominaz saritu.

Espainia (Hegoaldeko euskaldunok barne) eta Italia izanik orain artean Europako herrialderik zigortuenak, handik oso antzeko kopuruekin mintzatu da Italiako Babes Zibileko buru Angello Borreli: kazetariei deklaratu dienez Italian Covid-19az errealki kutsatuak izan litezke ofizialki kutsatutzat aipatzen direnen halako hamar. Zehazki 600.000 kutsaturen hipotesia aurreratu du (24 arratsaldera arte Italiak  69.176 kutsatu zeuzkan kontabilizatuta). Aho-bizarrik gabe esan du: "Kutsatutzat zertifikatutako bakoitzaren lekuan egon daitezke hamar".