Hemezortzi hilabeteko espetxe-zigorra eta kalte ordainak eskatzen dizkiote pertsona bati, iazko urtarrilaren 30ean Euskal Herriko Eskubide Sozialen Kartak deitutako greba orokorrean parte hartzeagatik. Auzipetua ez zuten ez identifikatu ez atxilotu greba egunean, baina autoritatearen aurkako atentatua eta lesioak leporatzen dizkiote. Ostegun goizean pasa da epailearen aurretik, Gasteizko epaitegien parean, Euskal Herriko Eskubide Sozialen Kartak deituta, elkarretaratzea burutzen zela. "Lan, pentsio, bizitza duina aldarrikatzea, ez da delitua!" lelopean, auzipetuaren babesa adierazi eta haren absoluzioa exijitu dute. Epaiketa askatasun politikoen aurkako erasoa dela salatu dute.

Epaiketaz gain, azken hilebeteetan greban parte hartu zuten hainbatek isunak jaso dituzte. Horiek guztiak "aldaketa soziala kriminalizatzeko saiakera" gisa ulertzen ditu Euskal Herriko Eskubide sozialen kartak, eta horien gainetik mobilizatzen jarraituko dutela jakinarazi du.