Berria-k landutako datuen arabera, hauek dira martxoaren 23ko datuak: 145 pertsona hil ditu koronabirusak Euskal Herrian eta 3.310 gaixotu, datu ofizialen arabera.

Lurraldez lurralde

Egun horretan lehen aldiz, Bizkaian (1.032) kasu gehiago baieztatu dira Araban (1.009) baino. Azkeneko egunetan, Nafarroan ere asko ugaritu dira (886). Gipuzkoa doakie atzetik (380), aurreneko gaixoetako bat bertan atzeman zuten arren. Ipar Euskal Herriko datuak ez dira zehatzak: Frantziako osasun sistemak eskualde administratiboen araberako datuak ematen ditu: Pirinio Atlantikoetan 40 gaixo atzeman dituzte, baina ez da posible probintziaka bereiztea. Jakin da, hala ere, gutxienez hamar kasu baieztatu direla Lapurdin, Baionako zahar etxe batean bost kasu atzemanda (hiru egoiliar eta bi langile). Zuberoako gaixoak Paueko ospitalera eramaten dituzte, eta han hil da zuberotar bat. Beste zuberotar bat ere bada Paueko erietxean.

Biztanleriaren arabera, Arabako 10.000 biztanleko, 30,43 zeuden kutsatuta martxoaren 23an, datu ofizialen arabera; Nafarroan 12,24 ziren; Bizkaian 8,95; eta Gipuzkoan 5,81.