Antiguatik Alderdi Ederrera egin zuten martxa, eta erdiguneko kaleetan bildu zen jende gehien. Horrez gain, txalupa batean Kontxako Badian ere protesta ekintzak egin dituzte. Proiektua geldiarazteko asmo argia dutela nabarmendu dute plataformako kideek, eta sare publikoa hobetzeko alternatibak badirela: “Egun gehien erabiltzen den garraio publikoa autobusa da. Funtzionamendu eta sare ona duen arren, hobetu daiteke. Hor jarri behar du Eusko Jaurlaritzak interesa, ez metroa eraikitzean”. Gainera, garraio publikoaren hobekuntza bermatzeko, gizarte eztabaida eta herritarren partaidetza prozesu bat eraikitzea “funtsezkoa” dela diote.

Gogor kritikatu du Satorralaia mugimenduak Eusko Jaurlaritzaren estrategia aldaketa: “Metroaren pasantea” izena izatetik, “Topoaren pasantea” izatera pasa da. Bai Donostiako baita inguru nahiz probintzia mailan metroaren egitasmoak sortu dituen kritika eta desadostasunak leuntzeko asmoz, izena aldatu diotela salatu du plataformak: “Ez ditzatela herritarrak engainatu: eraiki nahi dutena metroa da, ez topoa”.

Datozen egunetan Antiguan metroaren eraikuntza lanen hastapena eragozteko egingo den mobilizazio eta ekintzetan parte hartzera dei egin dute. “Berehala gelditu behar dugu indarrez inposatua izan den proiektu hau”. Bestalde, azaroaren 23an, arratsaldeko 17:00etan, Zarautz Etorbideko eremu kaltetuan asanblada egingo dutela jakinarazi dute, eta bertara gerturatzeko eskatu diete proiektuaren aurka dauden guztiei.