Hiria bizi

  • Deskonfinamendu garaian Bilboko udaletxeko balkoian “Aurrera Bilbo” zioen pankarta bat eskegi zuten, kalera ateratzen ginen lehen egunetan hiritarrok adoretzeko asmoarekin. Horren apaltasunak eta letra grisek adoretu baino errautsen artean ibili behar genuela transmititu zidan. Bilbok eremu mortua ematen zuen eta guk, hiritarrok, hondakinen artean mugitzen ikasi behar genuen. Egoera honek hiria birpentsatzeko beharra jarri du mahai gainean eta hori izan da Zinebi-k bilatu duena Bilbao Aurrera deialdiarekin. Hautatutako sei lanak aurkeztu dituzte bi saiotan.

Irudia: 'Harria eta bidea' lanetik hartua
Irudia: 'Harria eta bidea' lanetik hartua

Zer gertatuko da hiria desertu bihurtzen denean? Gure baitan bildu eta sormenari bide emango diogu, magiaren unea izango da edo, agian, bakardadeak akabatuko gaitu? Zer da hirian bizitzea, baina hiria ezin bizi izatea? Horiek dira Paula Gomezek eta Aitane Goñik planteatu dituzten galderak beraien Harria eta Bidea lan eder eta dotorean. Gazte bat autokonfinatuko da Bilboko etxe batean bere gorputza bizi eta sentitzeko helburuarekin. Gorputzaren kontzientzia hartzeaz gain, autokonfinamenduak bakardadearen eta heriotzaren kontzientzia emango dio protagonistari. Gorputza izango da bere territorioa, hor marraztuko dira kaleak eta eraikinak. Bilbo hondo-irudia izango da, besterik ez. Hiria are desertikoago bihurtuko da, desagertu arte. Ez da hiririk izango, ez biztanlerik. Soilik heriotza. J.G. Ballard idazle britainiarrak etxe-orratzen arriskuaz ohartarazi zuen High-Rise eleberrian eta badirudi bi egileek ideia hau hartu dutela oinarri: porlanezko hormen artean konfinatuta egoteak gizagabetuko gaituela.

'Aurrera Bilbo'
Zinebi 2021
Noiz: apirilak 8
Non: Bilboko Alondegia

Saioko bigarren laburmetraia Olaia Nogalesek zuzendutako lan kolektiboa izan zen, Miren Agur Meaberen olerki batean oinarrituta eta 50 lagunen ekarpenekin ekoiztutakoa. Partaideek hiriko kaleei argazkiak atera zizkieten eta jasotako materialarekin hiritik ibilbide bat osatu dute. Errailen gainetik egindako jite psikogeografikoaren modukoa izan da emaitza. Egileek botatako sokari lotu eta beraiek aukeratutako txokoetatik eramaten du ikuslea.

Azken lana Larraitz Zuazok eta Ane Rotaetxek film laburretik ordubeteko dokumentalera eramandako lana da. Lau artistak (Gari, Erlea Maneros, Katixa Agirre eta Ainhoa Artetxe) konfinamendu eta pandemia egora nola bizi izan duten aztertu eta aurretik dituzten erronkei nola helduko dieten planteatzen da bertan.

Pandemia osteko hiria birpentsatzea zaila bezain beharrezkoa da. Zaila da dolua oraindik bizitzeko astirik izan ez dugulako, Katixa Agirrek esan bezala. Eta beharrezkoa da, hirian bizi baino, hiria bizi behar dugulako, Paula Gomezek eta Aitane Goñik adierazi bezala.


Kanal honetatik interesatuko zaizu: Zinema
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


2024-03-03 | Ula Iruretagoiena
Lurraldea eta arkitektura
Komunak

Otsaila da iaz ekoiztutako pelikula uzten sari banaketaren hilabetea. Zinemara joateko aitzakiarekin, arkitektura eta hiria oinarri dituen Wim Wenders-en Perfect Days ekarri nahi dut hizketaldira.

Pelikularen sinopsi zabalduan irakurri daiteke komun publikoetan garatzen dela... [+]


Hizkuntza gutxituen artean, euskara hirugarren erabiliena da Europako streaming plataformetan

Netflix, Amazon Prime eta Disney+en, Hizkuntza Gutxituen Europako Gutunak onartzen dituen bost hizkuntza baino ez dituzte erabiltzen. Bosten artean nagusi da, alde handiz, katalana. Ondoren datoz galiziera, euskara, luxenburgera eta Eskoziako gaelikoa. EHUko Nor Ikerketa Taldeak... [+]


2024-02-19 | Euskal Irratiak
Graxi Irigarai: «Merkatua oztopo bat da Euskal Zinema Iparraldean hedatzeko»

Hizkuntza gutxituak eta eta Frantziako zine-sistema hartu ditu ikergai Graxi Irigarai baigorriarrak bere tesian. Abenduan aurkeztu zuen bere ikerketa, eta ordutik hamaika mintzaldi eskaini ditu. Oro har, Euskal Zinemak Ipar Euskal Herrian dituen zailtasun eta oztopoak eman ditu... [+]


Eguneraketa berriak daude