"Elhuyarrek EITBn adimen artifizialeko tresna ezarriko duela adierazi du", dio EHBE Euskal Herriko Bikoizleen Elkarteak zabaldutako oharrak. "Antza", azaldu dute, erremintak "sei hizkuntzatan transkripzioa, azpidazketa, itzulpena eta bikoizketa egiteko gai da". Hiru puntutan laburbildu ditu bikoizketarako gaitasunaren harira sortutako kexa eta ezinegonak.

Lehenik, azpimarratu du bikoizketa “prozesu artistikoa” dela eta “jatorrizko produktuaren balioa eta kalitatea mantentzearen alde” egiten dutela lan bikoiztaileek, “pertsonaien errealismoa, sinesgarritasuna eta sentimenduak islatuz”. Bigarrenik, adierazi du euren lanaren bitartez "ekoizpen handiko filmak, telesailak, dokumentalak eta abar euskaraz" kontsumitu daitezkeela, "jatorrizko produktuaren esentziari edo ñabardurei uko egin gabe". Bikoitztaileak "euskara hedatzeko eta sustatzeko ezinbestekoak" direla azaldu du EHBEk. Hirugarrenik, "makina batek ordezkatzea" ez dutela nahi adierazi du elkarteak, argudiatuz lanbidean urte asko daramatzatela “ikusleei kalitatezko edukia eskaini ahal izateko teknikak eta metodoak garatzen eta zaintzen”.

Arrazoi horiek direla eta "bikoizketa-prozesua osatzen duten profesionalak ordezkatzea helburu duen edozein tresna edo teknologiaren aurka" azaldu da EHBE.