Llámame Sinsorga (Dei nazazu Sinsorga) dokumentala estreinatuko da zinema aretoetan azaroaren 28an. Marta Gómezek eta Paula Iglesiasek zuzendutako lanak, ezkontza soinekoen denda izatetik kultura eta pentsamendu feminista sustatzeko lau solairuko kulturgune bilakatzeko berriztatze obra prozesua erakusten du. Era berean, obrak lehen planoan jarri du bost langileren lana, oraindik ere  gizonak nagusi diren arotz, interiorista eta brikolatzaile lanbide bateko aurreiritziei aurre eginez.

ARGIAn Saioa Baleztenak Andrea Momoitiori duela bi urte egin zion elkarrizketa, eta Bilboko Alde Zaharrean kokaturik dagoen kulturgunearen inguruan aritu ziren. Kazetari eta aktibistak adierazi zuen prozesua “zaila”, “nekagarria” eta “deseperantea” izan zela: “Auzolanean parte hartu nahi zuten emakumeak aurkitzea ez zaigu bereziki kostatu; zailena izan da legeak eskatzen dituen baldintzetan lan egiteko talde bat aurkitzea”. Kazetari moduan bizitako guztia biltzea garrantzitsua ikusi zuten eta horretarako bidelagun izana dute Al Borde Films ekoiztetxea.

Zinema aretoetara zabaldu aurretik, Varela eta Momoitio protagonista dituen dokumentalak Varsoviako Nazioarteko Zinemaldian egon zen. Bihargi saria eskuratu zuen Zienemakumeak gara! 30. edizioan. Sariak goraipatu egin zuen Al Borde Films ekoiztetxe bilbotarraren ibilbidea.

Hala dio sinopsiak: Maitasun erromantikoaren sinbolo izandako lau solairuko eraikin enblematiko hau bost langilek berreraikiko dute. Urtebetez, ikusiko dugu nola eraldaketak bere lanaren ikusezintasunei aurrera egiten dien, kontakizun baten bidez, obraren kostunbrismoa eta proiektua zeharkatzen duten beldurrak eta nahiak agertzen diren performance-unibertso bat elkarrekin biziz. Dokumentalak ustez gizonenak ziren lanak egitea erabakitzen duten emakumeen zailtasun eta indarkerien inguruan berri ematen du.