Ikusten ez denaz

Onintza Enbeita
2015eko maiatzaren 17a

 

 

 

 

 

 

 

 


Lau hizlari*, lau berba
puntu, koma, marra.
Lau lagun: hiru eme
tartean bat arra
betaurrekoak falta
sobera bizarra
sasoi baten ispilu
aurrean oilarra
emeak ikusteko
nonbait bista txarra.


Mende erdi atzera
egiteko gertu:
aldaketa urteak
nola ziren lehertu.
Aresti, Lauaxeta
hausnartu, aztertu
Txabi gabeko Bilbo
be ezin ulertu
baina neskarik inon
ez ginen agertu.


Isilik egotea
ez ei da problema
batez ere jakinda
aukera bat dena.
Batek jan dezakeen
pozoinik txarrena
erretzen dizkiona
erraiak, barrena
da isiltzen dutenean
isiltzen duena.

 

Historia hurbila
hemen da goria
azalek dute gerra
tatuai lodia.
Non daude galtzaileen
dominak, gloria?
Beldurrak isilduen
egunak, zoria...
Geu ari gara josten
geureen historia.


Gerratik ihesean
joandako moduan
laurogeitamarreko
urteen inguruan
kaleak sutan zeuden
gazteak guduan
hodeiertza ikusten
zaila zen zeruan
ta euskaldunak arnasa
behar du munduan.


Norberak norberea
bizi ohi duenez,
kontakizunak ditu
beregain hainbat ertz.
Dena ez da zuria
ta dena ez da beltz
sasoiak pasa ahala
bizirik gaudenez
Beltzuria daukagu
gordeleku legez.

Bidali zure iritzi artikuluak iritzia@argia.eus helbide elektronikora
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Iritzia

Iritzia kanaletik interesatuko zaizu...
ASTEKARIA
Azkenak
EGILEA
Eguneraketa berriak daude