Gobernu berriari begira

Gasteizen frackingaren aurkako azken manifestazioaren oihuen oihartzunak itzali gabe daude. Araba eta inguruko biztanleek argi eta ozen erakutsi zuten haustura hidraulikoaren aurkako jarrera. Adin, kolore eta pentsamolde desberdinetako jendearen aho bateko mezu zuzena entzun zen: fracking ez, ez hemen eta ez inon!

Ikuspuntu guztietatik alferrikako proiektua dela argi azaldu du Fracking Ez Arabak. Urte osoan buru-belarri lanean aritu gara eta emaitzak ukaezinak dira: Arabako 26 udalerrietan frackingaren aurkako mozioak onartu dira,
frackingaren aurkako borroka babesten duten alderdi politiko, sindikatu, lurraren defentsan diharduten elkarte, eta beste hainbat talderen kopurua ikusgarria da. Borroka babesten duten pertsonen kopurua milakotan zenbatu daitezke, horren guztiaren isla ederki baino hobeto ikusi genuen urriaren 6ko manifestazioan.

Gizartearen borondateak ordea, politikarien asmoetan eta ekimenetan eragin behar du. Ezin dugu ahaztu frackinga, EAEko Gobernuaren babesean dagoen Hidrocarburos de Euskadi enpresa publikoaren eskutik datorrela Euskal Herrira. Guztiona den diruz ordainduko dituztela lehendabiziko txikizio lanak. Hori horrela, aurreko gobernuaren eta datorrenaren borondatea guztiz erabakigarria izango da.

Datorren gobernuak frackingaren aurrean duen erronka ez da nolanahikoa: Energia industria boteretsutik datozen interesen aurrean makurtu eta lurraldea arriskuan ipini ala herritarren kezkari eta mezuari kasu egin eta proiektu hauek bertan behera utzi.

Orain arte ikusitakoaren arabera, zalantza handiak ditugu datozen hilabeteei begira. Politikari guztiek diote ez dutela ingurumena arriskuan jarriko, baina ez dira horrenbeste frackinga ez dela egingo diotenak. Dagoeneko jendeak badaki, frackinga egiten bada, arriskuak ezingo direla ekidin, ezbeharrak gertatuko direla, eta nahiz enpresa zulatzaileak “praktika onak” egiten saiatu, baliabide fosiletan oinarritutako eredu energetikoak inongo etorkizunik ez duela. Klima aldaketa areagotu eta baliabide berriztagarrien atea itxiko du frackingak.

Honen guztiaren aurrean, gure ustez, datorren Euskal Jaurlaritzak pauso argiak eman beharko ditu. Pauso zuzenek mugarri hauek barneratu beharko lituzkete:
    – Frackinga egiten hasteko diru publikoa ukatu.
    – EAEko eremuan, onarpenaren zain dauden Lurra, Lore, Saia eta Landarre hidrokarburo ikerketa baimenak atzera bota.
    – Jadanik Espainiako Estatuko Industria Ministerioak onarturiko dozena luze baimenak atzera botatzeko presioa egin.
    – Kantabriako Gobernuan frackinga debekatzeko emandako pausoak jarraitu eta horretarako bere  esku dauden baliabide legegile guztiak erabili ekimenak gelditzeko.
    – Baliabide berriztagarrien aldeko apustu argia egin.

Bitartean, Fracking Ez Arabak bere esku dituen bide guztiak jorratzen jarraituko du agindu duen bezala, baita gobernu berriaren pausuak aztertzen ere.

Bidali zure iritzi artikuluak iritzia@argia.eus helbide elektronikora

ARGIAk ez du zertan bat etorri artikuluen edukiarekin. Idatzien gehienezko luzera 4.500 karakterekoa da (espazioak barne). Idazkera aldetik gutxieneko zuzentasun bat beharrezkoa da: batetik, ARGIAk ezin du hartu zuzenketa sakona egiteko lanik; bestetik, egitekotan edukia nahi gabe aldatzeko arriskua dago. ARGIAk azaleko zuzenketak edo moldaketak egingo dizkie artikuluei, behar izanez gero.


Kanal honetatik interesatuko zaizu: Iritzia
2024-05-22 | Inma Errea Cleix
Zaintzaren erdigunean

Bati fardela aldatzea. Beste bati gorputza garbitu eta ximentzea. Jana atondu eta norbaiti jaten ematea. Norbaiten gorputza oheratu edo ohetik altxatzea. Goitikan ari dela inori eutsi eta hura garbitzea. Horiek guztiak dira zaintzeko lanak. Zerrenda askoz luzeagoa da, nahiz... [+]


2024-05-22 | Edu Zelaieta Anta
Kontzertu estelarrean (fikzio espekulatibo bat)

Aurtengo jazzaldiaren kontzertu estelarrean zaude, zuk gehien maite duzun pertsona (multzo) batekin. Pradales dagoeneko lehendakaria da eta, beraz, Osakidetzaren arazo larria onbideratzen ari dira. Espiritu autonomikoa nagusi da jendearen aldartean; hori dela medio, berdin egon... [+]


Mila esker, euskara

Mila esker, euskara, gure gaitzaren sintomak erakusteagatik. Izan ere, hemen arazorik ez dugula emanen luke, zuregatik ez balitz, menderakuntzarik ez dagoela, posible dela garrantzizko ezer gertatuko ez balitzaigu bezala bizitzea. Tira, nahiko genuke hori ameskeria fantasiosoa... [+]


Eguneraketa berriak daude