Mikel Jimenez eta Aritz Azkona gazte iruindarrak joan den ostiralean atxilotu zituen Guardia Zibilak Auzitegi Nazionaleko atarian, beren borondatez epailearen aurrera deklaratzera zihoazenean. Atxiloketa agindua zegoen beraien aurka eta etakide gisa agertzen ari ziren poliziaren afitxetan. Orain artean aipatutakoan ez da ezer izugarri berezirik, zentzugabea dirudi epailearen aurrean deklaratu aurretik atxilotzea, baina sarri gertatu da. Bitxia ere bada ustezko bi etakidek besterik gabe beren burua entregatzea. Ohikoena izaten da etakideek ihes egitea eta beren jardun armatuan jarraitzea, hurrengo batean atxilotu arte. Harrigarriena da, eta hor da notizia, ez dituztela torturatu. Tratu deserosoa bai, baina tratu txarrik eta torturarik ez. Beste datu bat, Nafarroan abuztu bukaeratik hona atxilotutako beste guztiak ez bezala, ez zeuden inkomunikatuta eta abokatuak larunbatean ikusi ahal izan zituen. Ohikoena beharko lukeena salbuespena da hemen. Komunikabide, agintari eta alderdi politiko nagusienen agendetan tortura edo ez da esistitzen edo bere lekua hutsala da. Salbu eta norbait ospitalean oso egoera larrian eta tratu txarren zantzu nabarmenekin agertzen denean. ENAMeko egitura eta usaina duen ororekin gertatzen ari diren salbuespen neurri ugarietatik bortitzena eta basatiena da torturarena; EAEko Auzitegi Goreneko lehendakari Fernando Ruiz Piñeirok hain gustura azpimarratzen duen “legearen inperio” horrek babestua. Eta inperio horrek 8-10 urteko kartzela zigorra baldin badu Segiko gaztea izan edota zabor edukiontzi bat edo kutxazain bat erretzeagatik, norantz bultzatzen dute gazte hori?

Ibarretxe lehendakariari argi adierazi zion Ruiz Piñeirok bera ere Espainiako legeen menpe dagoela. Espainiako epaileek izan dezaketen botere itzelaren beste adibide bat da urtarrilaren 8an bistaratuko den auzi hau, oso urruti joango ez bada ere, bere helburu nagusia beteko duena, Eusko Jaurlaritzako lehendakaria auziperatuen aulkian jartzea. Irudi hori latza litzateke ustelkeriaz epaitzeko balitz, baina ez, Batasuneko buruzagiekin publikoki hitz egiteagatik da. Eta berdin PSEkoak. Hemen inork gutxik ulertzen du. Ea balio duen atzerrian Espainiako inperioaren legean gertatzen direnak hobeto ulertzeko. Ez litzateke gutxi.

PP eta UPN bakoitza bere kabuz hurrengo hauteskundeetan Nafarroan? Ez, ez da gertatuko, urak ez du gainezka egingo, moldatuko dira lehenago. Moldatuko diren moduan PSNrekin berriz botere egiturak lotzeko. UPNren nagusitasunaren porrota PSNren porrotetik bakarrik etor daiteke. Eta ez dirudi hori bihar goizean gertatuko denik. PSNren barne indarren orekak ez du halakorik adierazten. Eta boto emaileen multzo handi batean behintzat ez dirudi UPN-PSN eskema hori guztiz deserosoa denik. Oposizioak badu higatze lanik.