Juan Luis Arexolaleiba, AED euskara elkartean eta Emun-en lanean aritua. Arrasaten (Gipuzkoa) jaio zen 1964an eta bertan bizi da. Geografia eta Historia lizentziatua da. Urte askotan euskararen inguruan aritu da lanean. AED (Arrasate Euskaldun Dezagun) euskara elkartean zazpi urtez aritu zen dinamizatzaile. Arrasateko Udalean sei urtez zinegotzi izan zen. Azken hiru urtetan Emunen aritu da, lana euskalduntzeko kooperatiban. Orain kooperatibagintzaren gizarte erantzukizunarekin zerikusia duen proiektu batean hasi da lanean.

Iñaki Arruti, Lasarte-Oriako Euskara Zerbitzuko arduraduna. Lasarte-Orian (Gipuzkoa) jaio zen 1966an eta bertan bizi da. Ikasketaz biologoa da. 1988tik Lasarte-Oriako Euskara Zerbitzuko arduraduna da. 1991n, Lasarte-Orian Ttakun Kultur Elkartea sortzen ibili zen eta zuzendaritzako kidea izan da 2004ra arte. Topagunearen (Euskara Elkarteen Federazioa) sorreran aritu zen 1996an. 1996tik 1999ra Euskararen Aholku Batzordeko kidea izan zen. Hizneteko irakaslea da berau sortu zenetik.

Karmen Irizar, Topaguneko lehendakaria. Azkoitian (Gipuzkoa) jaio zen 1973. urtean eta bertan bizi da. Euskal eta Ingeles Filologiak ikasiak ditu. Gaur egun irakaslea da Azpeitiko Iraurgi ikastetxean. Azkoitiko Maxixatzen euskara elkarteko sortzaileetakoa da eta sortu zenez geroztik lehendakaria. Topaguneko zuzendaritzan dago 2003az geroztik eta federazioaren lehendakaria da 2006. urteaz geroztik. Euskadi Irratian Arratsaldekoa irratsaioan kolaboratzen du astero.

Amaia Miner, Arkitektoa eta Doberako kidea. Andoainen (Gipuzkoa) jaio zen, 1975ean eta Hernanin bizi da. Arkitekturan lizentziatua da eta gaur egun Zarauzko Udaleko arkitektoa da. Hernaniko Dobera euskara elkartean urteak daramatza. Gaztetxo zela gerturatu zen eta 2001ean elkarteko zuzendaritzan sartu zen. 2007ra arte lehendakaria izan da.