Francisco Gonzalez, PPko gobernuak bere garaian eman zion sostenguari esker BBVAko presidentea dena, urakanaren begian dago orain. Noiz eta orain, otsailaren 26an Bilbon 2004ko ekitaldiari dagokion Akziodunen Batzar Nagusia egitekoa denean. Izan ere, milioi askoko mozkinen marka berria erakusteko aukera izango du. Hala ere, publikoki eta ofizialki egin beharko dio aurre presidentziatik erorarazteko duela hilabete batzuk abiatu den ofentsibari. Gonzalezek, BBVAko kopresidentziara iritsi zenean, aurreko goi-kargudunak erorarazi zituen, Emilio Ybarra eta Pedro Luis Uriarte buru zirela, eta orduan bezala, orain ere bada botika bera eman nahi dionik, kargutik botatzeko.
Ofentsiba
Bi dira ofentsiba horretako gertaera garrantzizkoenak: inbertitzaile-talde batek administrazio-kontseilua kontrolatzeko egindako saiakera eta FGk (Francisco Gonzalez) aurreko bere burtsa-enpresaren (FG Valores) gestioan egindako ustezko irregularitateak argitara ateratzea. Lehenik eta behin, inbertitzaile-talde batek, SACYR eraikuntzako enpresa buru dela, Euskal Herriko banku horren kapital sozialaren %5 bereganatu nahi du. Horrek administrazio-kontseiluan egoteko aukera emango lieke, baita presidentziara heltzekoa ere. Helburu horretarako, enpresa horrek baditu bere indarrak, baina, horrez gain, beharrezkoa gertatuko balitz ere, akzioetarako kolaborazioa hitzartua dauka BBVAko kontseilari ohi batzuekin; besteak beste, Pedro Ampuerorekin. Neguriko enpresari horren hurbileko norbaitek entzun dio FG "erorarazteko" gogoa duela esaten, hark kenarazi baitzuen, beste batzuk bezala, kontseiluko kargutik.
Akzioen arloko ofentsiba horrekin batera, azken asteetan, FGk bere aurreko burtsa-enpresan (FG Valores) egin zituen ustezko irregularitateak harrotu dira; hain zuzen ere, enpresa hori 1996an Merrill Lynch banku amerikarrari saldu zionean egin bide zituenak. Banku horrek salatu duenez, ingeniaritza finantzarioko operazio oso sofistikatua egin zuten, akziodunei "kontabilitatean gutxienez 800 milioi pezetako zorpekoa" ezkutatzeko bidea eman zuena. Horrexegatik, Merrill Lynchek dioenez, erosketako prezioa hasieran itundutako 12.000 milioi pezetetatik 2.000 milioira beheratu zuten (hasierako prezioa baino 10.000 milioi gutxiago). Halako egoera ikusita, banku amerikarrak uko egin zion sozietatea erosteari, eta operazioa FG Valores enpresaren aktiboak eroste hutsean geratu zen. Egoera hori 1996ko ekainean salatu zuten CNMVn (Balore Merkatuko Komisio Nazionala), PPko gobernuak FG Argentariako presidente izendatu eta handik gutxira. Garai hartan PPk kontrolatzen zuen CNMVk ez zuen inolako neurririk hartu orduan. FGk Juan Fernandez-Armesto abokatuaren esku utzi zuen gaia, eta hura izendatu zuten, hilabete batzuk geroago, CNMVko presidente.
Suntsitutako salaketak CNMVn
FGk argudiatzen du "kontabilitateko akatsak" baizik ez zirela izan, eta enplegatu bati leporatu dio erantzukizuna. Orain mahai gainean jarri den arazoa da azken aste hauek arte gaia ahazturik zegoela. Ezagutarazitakoan, orain PSOEko gobernuak kontrolatzen duen CNMVk ikerketa abiatu zuen, nahiz eta ohartarazi zuen horri buruzko edozein delitu honezkero preskribitua dagoela. Onartu zuen, hala ere, artxiboetan ez dela ageri gaiari buruzko inolako salaketarik, eta horrek bide eman dio salaketa hori bere garaian suntsitu egingo zutelako tesiari. Hori egia izanez gero, prebarikazioko delitu ustezkoa inplika lezake, CNMVren baitan FGren mesedetan egindakoa, eta ondorioz, Korrupzioaren Kontrako Fiskaltzara eraman liteke. Hala ere, oraingo CNMVk ofizialki "itxi" du kasua, hiru eguneko ikerketaren ondoren, argudiatuz ia ezinezkoa dela 1996an gertatu zena argitzea... Itxura guztien arabera, modu faltsuan itxi zen, eta beste fronte berri batzuk agertuko dira.
Zerikusirik izan al zuten FGk eta Aznarren gobernuak CNMVn artxiboak desagertzearekin? Edozein kasutan, BBVAko egungo presidentearen irudia, delituak preskribituak baleude ere, ez da hoberena euskal bankuko presidente izaten jarraitzeko. Eta, itxura guztien arabera, FGren erorketa seguruago gerta liteke orain azaleratutako gertaera horiengatik ezen ez SACYR bezalako inbertitzaile berrien bidetik. Jakina, FG PPren gobernuak jarri zuen BBVAko presidentzian. Eta, orain, PSOEren gobernua da BBVA kontrola dezakeena, zeren Argentaria, BBVrekin bat egin zuena, banku publikoa baitzen.