COPE irrati kateak kontu korronte bat zabaldu du banketxe batean Eusko Jaurlaritzak Coviteri (Terrorismoaren Biktimen Kolektiboa) ukatu ei dion diru-laguntza jaso nahian. Covitek aurten 30.050 euro jaso ditu Eusko Jaurlaritzatik, baina Covitek gehiago nahi zuen, besteak beste, Euskal Herrian biktimez arduratuko zen bulego bat sortzeko. COPEk, beraz, kontu korronte horrekin, Jaurlaritzaren jarrera salatu nahi izan du. Honen guztiaren harira, ETAk eragindako biktimen elkarteei 2003 eta 2004rako PPren Gobernuak eman zien laguntza zuzena 600.000 eurokoa izan zela ezagutu da. Diru gehien AVT elkartek jaso zuen, 213.000 euro, Covitek 50.000 euro eta Fundación Papeles de Ermua elkarteak 46.000 euro. Beste 251.000 euro hamabi elkarte desberdinek eraman zituzten, esate baterako, giza eskubideen aldeko Miguel Angel Blanco Fundazioak 33.000 euro, Tomás Caballero Fundazioak 32.000 eta Gregorio Ordoñez Fundazioak 30.000.

Alderdi Politikoen Legeak ekarritako ondorioak saihesteko udal kontseiluak sortzea proposatu die Aralarrek alderdi politikoei. Hauetan ordezkaritza lortutako udal hautetsi guztiak egongo lirateke, legez kanpo utzitako ezker abertzalekoak barne, eta kontseilu hauetan erabakitakoa onartuko litzateke ondoren udal batzetan. Aralarren esanetan, zortzi udaletan neurria abian da jada.

Xabier Arzalluz, EAJko buruzagi ohiak jakinarazi duenez, PSOEren Gobernua ETArekin hitz egiten ari da. Informazioa berehala gezurtatu dute bai PSOEtik eta baita Batasunetik ere. Xabier Arzalluzen hitzak nola interpretatu behar diren sukalde lanetan ari direnek jakingo dute hobeto, baina PSOEk horrelakorik ez duela egingo azpimarratu du eta Batasunak hori Aljerreko eredua dela aipatu du, dagoeneko ezker abertzaleak baztertua duen negoziazio eredua. Etengabe Madrilera begira aritzeko garaia iragan dela esan da Batasunetik, eta irtenbidea Euskal Herriko alderdien artean adosten dena aurrera eramatea dela. PSOEk 1982an lortu zuen lehenbiziz Espainiako Gobernuko lidergoa eta harrezkero bere gobernu guztiek izan dituzte kontaktuak ETArekin.

Patxi Lopez jadanik ofizialki da datorren maiatzean egingo diren EAEko hauteskunde autonomikoetarako PSE-EEren lehendakarigaia. Jose Luis Rodriguez Zapatero Espainiako Gobernuko lehendakariaren sostengu osoa duela irudikatu berri du Bilbon eta horretarako Sestaoko La Naval ontziolaren etorkizuna berma dezakeela erakutsi nahi izan du. Madrilen eta Gasteizen PSOEk gobernatzearen indarra erakutsi nahi izan du Lopezek, txistuaren, txalapartaren eta euskararen doinuez jantzita. Kataluniako PSCren ereduari jarraiki, baina hark erakutsi izan duen ausarditik oso urrun oraindik. Harengana noraino hurbiltzen den hasiko gara ikusten apurka, batez ere autonomia estatutu berriaren proposamena pixkanaka aletzen hasi ahala. Asko dago ikusteko eta entzuteko datozen hilabeteetan, baina PSE-EEk egin nahi duen bideari ez zaio ikusten oraindik Eusko Jaurlaritzako lehendakaritza irabazteko adinako indarrik eta sinesgarritasunik.

Irakaskuntza Publiko elebiduneko gurasoek hainbat eskakizun egin zioten Hezkuntza Ministerioari eta ikasturte honetan, euskara irakasteko beharrezko lanpostuak sortuko zituela uste zuten. Ez da hala gertatu, ordea, eta Ikas-Bik bost eskakizuneko zerrenda zehatza igorri dio Hezkuntza Ministerioari. Bi hilabetean erantzunik ez badu auzitara joko du elkarteak.

Sakanako Altsasu herriko institutuko ikasleek Nafarroako Parlamentuan Lanbide Heziketan euskaraz ikasteko aukera eskatu berri dute. Luis Campoy Hezkuntza kontseilariak eskaerari erantzun dio. Hona esandako batzuk: ez daukala euskarazko Lanbide Heziketa bultzatzeko inolako intentziorik, lehentasuna ikasketen kalitatea bermatzea dela eta inolako taldek ez duela kritikatu bere sailaren politika orain arte.

Ikasturte honetako matrikulazio datuen arabera, 18 urte arteko EAEko ikasleen %50,3ak aukeratu du D eredua. B ereduan %23,1 arituko da eta behera egin duen eredu bakarrean, A ereduan, % 26,5a. D ereduaren igoera %3,3koa izan da. Nafarroan %30ak ikasiko du gorantz egiten ari den D ereduan.

Hizkuntza Politika aztertzeko ponentziak hasi dira eta Pedro Pegenaute eta Andres Iñigok egin dituzte agerraldiak. Pegenaute Hizkuntza Politikako zuzendari nagusiak nabarmendu zuenez, Euskararen Legea eskuetan duela, egin behar duena egiten ari da. Irailaren 15ean Gregorio Monrealek hitz egingo du, 22an Jose Maria Rodriguezek eta 29an Hizkuntza Gutxituen Bulegoko ordezkariek eta Euskara Kultur Elkargoko kideek.

Irailaren 2an Hautetsien Kontseiluan egin zuen protesta Seaskak eskolak emateko baldintza egokiak eskatuz. Irailaren 6an, berriz bildu ziren erantzun baten zain daudela gogorarazteko. Alain Lammassoure Hautetsien Kontseiluko Presidentea eta Brisson Kontseiluko Euskara Saileko arduraduna Frantziako Hezkuntza Ministerioarekin eta Parisko errektorearekin harremanetan jarri dira. Errektoretzak epe laburrean biltzeko proposamena luzatu die Seaskakoei. Hala ere, dituen beharrek bestelako trataera behar dutela azpimarratu du Seaskak eta aldarrikapen oinarrizkoak lortzen ez baditu mobilizazioak egingo ditu.