Kanboko lehenengo otxote jaialdia antolatu duzue maiatzaren 10, 11 eta 12rako. Nondik nora?

Gaztegoa nintzenean Gipuzkoara gerturatzen nintzen otxoteak entzutera, han bazen zaletasuna eta niri ikaragarri gustatzen zitzaidan. Kanbon ere antzeko jaialdirik antolatu zitekeela pentsatu nuen eta Arraga koraleko lehendakariari aitatu nion. Nik entzun eta ezaguna nuen otxote giro hura Iparraldean ere bultzatu behar zela erabaki genuen.

Iparraldeko hiru talde eta Hegoaldeko beste hiru gonbidatu dituzue. Oreka bila?

Mugaz bi aldeen arteko elkarkidetza bultzatzea da jaialdiaren xede nagusia. Lan handienak Iparraldeko otxoteak aurkitzeak eman dizkigu. Bakarra baitzegoen; azkenean ordea beste koru batzuetakoei deitu eta osatu dugu egitaraua. Honela, ostiralean «Leinuak» lapurtarra, Bilboko «Argi-Iberdrola» eta Biarritzko «Oldarra» izango dira eta larunbatean berriz, Donostiako «Easo» koruko otxotea, Baionako «Errobi kanta» eta Iruñeako orfeoiko «Napardi». Igandean guztiek batera kantatuko dute. Emanaldi guztiak Kanboko elizan dira.

Gaur ez dira otxoteak asko entzuten...

Gaztea nintzenean Hegoaldean bereziki ez ziren sekula falta izaten otxoteak. Orain indar asko galdu du. Hegoaldean, esaterako, gu joan izan garenetan jende gutxi hurbildu da eta Iparraldean, aldiz, jendek geroz eta arreta gehiago jartzen die, baina hala ere ez dago oso zabalduta.
Baldintza horietan ez da erraza izango arrakasta bermatzea

Arrakasta prezioa eta kalitatearen araberakoa izaten da askotan. Gurera, euskal koru onenak datoz eta sarrera 50 libera besterik ez da kostatzen. Guretzat garrantzitsuena sarrera asko saltzea da, jaialdiak datozen urteetan ere jarraipena izan dezan.

MAITE ARTOLA