Urkulluk adierazi du enpresak ixtea ez dagoela Eusko Jaurlaritzaren esku eta aitortu du goizean (martxoak 22) Espainiako gobernuko presidenteak Estatuko erkidegoetako presidenteekin egindakoan bileran jarduera ekonomikoa eteteaz hitz egin zela.

Ospitaleen edukiera

Lehendakariak adierazi du helburua ospitaleen edukiera handitzea dela eta horretarako hiru neurri iragarri ditu: Gasteizko Txagorritxu Ospitaleko bost solairu koronabirusa duten gaixoentzat prestatzea; osasun publikoaren eta pribatuaren arteko lankidetza sustatzea; eta ospitaleak berrantolatzea. Beharra sortuz gero BBK Fundazioaren egoitzak erabiliko lirateke Bizkaian, eta Gipuzkoan, Quiron Klinika.

400.000 maskarilla erosi dituztela adierazi du eta hasi den aste honetan beste milioi bat iritsiko direla.

Espainiako armada

Larrialdietarako Unitate Militarra (UME) Euskal Autonomia Erkidegoan sartu dela galdetuta, hala egitea Espainiako Gobernuaren erabakia izan dela esan du lehendakariak. EAEk bere baliabideak dituela errepikatu du, eta “zerbitzu jakin batzuetarako” Armada ez dela beharrezkoa.

Urkulluk esan du okerrena iristear dela eta ez dela alarmismoa. Haren ustez, apirilean hasiko dira murrizten koronabirus kasuak.