2020ko ekainaren 05a
Water for Rojava, edo Ura Rojavarentzat, kanpaina abiatu dute aste honetan, Siriaren menpeko Kurdistanen Daesh eta Turkiako armadak hondatutako azpiegiturak konpondu eta emakumeek sortutako kooperatibak bultzatzeko, besteak beste.
ANF agentzia kurduak eman du kanpainaren berri. Bertan irakur daitekeenez, ondorengo proiektuak garatu nahi dituzte: bonbardaketek kaltetutako azpiegiturak konpontzea, ura ateratzeko putzuak zulatzea (asko hondatu egin baitira azken urteetan) eta errefuxiatuen kanpalekuetarako ur-bonbak eraikitzea (leku hauetan bizi diren herritarren kopuruak gora egin baitu azken urteetan). Nekazaritza ureztatzeko gailuak eta ibaiak garbitzeko makinaria lortu nahi dute.
"Nahiz eta azken bi urteetan Afrîn, Serêkaniye eta Tel Abyad herri kurduak okupatu eta gerra hasi, Siria ipar-ekialdeko herritarrek demokrazia zuzen, ekologiko eta parekide baten helburua lortzeko lanean jarraitzen dute", irakur dezakegu.
Kanpainaren gunean honakoa irakur daiteke: "Rojavan iraultza hasi zenean, lurpeko uraren maila oso baxua zen, batez ere Siriako erregimenak azken lau hamarkadetan antolatutako monolaborantzako nekazaritza industrialaren ondorioz, baita krisi globalaren ondorioz prezipitazioak gutxitu zirelako. 2015ean, Turkiako estatua ura Rojavaren aurkako arma gisa erabiltzen hasi zen, Turkiatik siriara doazen ibaietako ura desbieratuz eta geraraziz presekin. Egoera larria da eta COVID-19 arrisku gehigarri bihurtu da. Pandemia garaiotan, ura inoiz baino beharrezkoagoa da".
Diru ekarpena egin nahi duenak lotura honetan aurkituko du modua.
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
