Pradalesen sailburuak: Osakidetzako EPE irregularrean zegoen bat, ustezko prebarikatzaile bat eta hiru sailburu erdaldun

  • Inoizko sailburu gehien edukiko ditu Imanol Pradales lehendakari izango duen Jaurlaritza berriak: hamar EAJk eta bost PSE-EEk. Sozialisten hiru sailburuk ez dakite euskaraz.


2024ko ekainaren 24an - 11:30
Zarata mediatikoz beteriko garai nahasiotan, merkatu logiketatik urrun eta irakurleengandik gertu dagoen kazetaritza beharrezkoa dela uste baduzu, ARGIA bultzatzera animatu nahi zaitugu. Geroz eta gehiago gara, jarrai dezagun txikitik eragiten.

Profil "teknikoa" duten sailburuak direla azpimarratu du Hego Euskal Herriko prentsa erdaldunak larunbatean Imanol Pradalesek ekipoa aurkeztu zuenez geroztik. Bereziki sailburu jeltzaleak jo dituzte profil "tekniko" horretakoak; sozialistak, berriz, "alderdikoiago".

EAJkoak dira fiskaltzak noiz edo noiz bera edo bere jarduera jakin bat ikerketapean ipini duten arren, sailburu izendatu dituzten bi pertsona: Alberto Martínez, Osasun sailburua, azken 23 urteetan Gurutzetako ospitaleko Anestesia arloko burua izan dena; eta Amaia Barredo Elikadura, Landa Garapena eta Arrantza sailburua, Arantxa Tapiaren sailburuorde izandakoa eta Arabako diputatua Jasangarritasun arloan.

Denbora luzean katramila sortu duen baina oraindik argitu gabe dagoen Osakidetzako lan-eskaintza publikoko 2018ko azterketa irregularreko tribunal buruetako bat zen Alberto Martínez. Bera ez dago ikerketapean, baina berak eta azterketagile batek izandako elkarrizketaren grabazioa "egozgarria" zela esan zuen fiskaltzak. El Diario agerkariko Iker Rioja kazetariak jaso duen moduan, azterketa egin behar zuen gertuko pertsona batek "babesean hartzeko" eskatu zion Martínezi. Ez zen batere harritu; halakoak egin izan diren seinale, beraz. Hala ere, Martínezek erantzun zion une horretan bertan ez zekiela tribunaleko buru izango zen ala ez, eta hilabete geroago etortzeko berriz "gaia jorratzeko".

Barredo, Ingurumen sailburuorde izan dena, Euskadiko Auzitegi Gorenak ikertzeko zain dago gaur egun. Izan ere, Bergarako Valogreene Paper proiektuari emandako baimenaren tramitazioetan irregulartasunak egon daitezkeela uste du fiskaltzak. Gasteizko Auzitegia ari zen ikertzen, baina sailburu kargua hartu eta aforatua izango denez, Gorenaren eskuetara igaroko da. 

Hamabost sailburu edukiko ditu Pradalesen gobernuak, hamar EAJk eta bost PSE-EEk. Urkulluren legegintzaldiaren PSE-EEk bi eta EAJk bat gutxiago zituen. Gobernu horretan sailburu bakar bat zen soilik erdalduna; orain, hiru sailburuk ez dakite euskaraz.

HAMABOST SAILBURU, KARGUAK ETA PROFILAK

Ageriko nobedade bat baino gehiago ditu gobernu berriak. Esaterako, "Garraio" karguari ez zaiola aurrerantzean horrela deituko, baizik eta "Mugikortasun jasangarria" –lehen biak erabiltzen ziren–. Horrez gain, eta bistakoena, ez dagoela "Berdintasun" izena daraman sailik. Izan ere, hainbat feministek askotan eskatu bezalaxe, Pradalesen Lehendakaritzaren esku geratuko da, berak esan moduan, "gizarte politika feministak" egitea. Harridura sortu duen bestea, Pradalesek Zupiria ipini izana Segurtasun sailburu.

Imanol Pradales

Lehendakaria. (EAJ)

Santurtzin jaioa, 1978an. Soziologoa ikasketez, Deustuko Unibertsitatean doktore da. 2007tik Bizkaiko Foru Aldundiari loturik egon da. Diputatu 2011tik, Ekonomia Sustatzeko arloan lehenik eta Azpiegituren alorrean gero.

Ibone Bengoetxea

Lehen lehendakariordea eta Kultura eta Hizkuntz Politika sailburua. (EAJ)

Bilbo, 1967. Psikologian lizentziaduna da. Udal zinegotzia izandakoa, EUDELeko presidente, Aldundiko diputatu zazpi urtez eta EiTBren zuzendaritzan geroztik.

Mikel Torres

Bigarren lehendakariordea eta Ekonomia, Enplegua eta Lan sailburua. (PSE-EE)

Portugalete, 1970. Ekonomia eta Enpresa zientzietan lizentziaduna EHUn, eta ekonomiako bi doktorego ditu. Bizkaiko PSEren idazkari nagusia da 2014tik, eta alkatea bere sorterrian.

Ez daki euskaraz.

Maria Ubarretxena

Gobernu bozeramalea eta Gobernantza, Administrazio Digitala eta Autogobernu sailburua. (EAJ)

Urretxu, 1980. Jaurlaritzaren Enplegu eta Gizarte Politiken sailean lan egin ondoren, Arrasateko alkatea izan da 2015etik 2023ra. Alkatetza galdu ostean, Gipuzkoako Diputazioko Bide Azpiegitura diputatua izan da.

Bingen Zupiria

Segurtasun sailburua. (EAJ)

Hernani, 1961. ETBko eta Deia-ko zuzendari izan ondoren, eta tartean Ardanza lehendakariaren aholkulari izanda, Kultura eta Hizkuntz Politika sailak gobernatu ditu aurreko bi legegintzaldietan. Jaurlaritzako bozeramale ere izan da.

Begoña Pedrosa

Hezkuntza sailburua. (EAJ)

Areatza, 1975. Aurreko sailburuaren ordezkoa izan da. Aurretik, MU-ko dekanoa izan zen sei urtez. Hizkuntzalaritza Aplikatuan doktorea da.

Noel D'Anou Olaizola

Ogasuna eta Finantzen sailburua. (EAJ)

Irun, 1975. Banketxeen arloan egin du ibilbide profesionala. Hainbat ardura eduki ditu Kutxabanken azken hamar urteetan.

Mikel Jauregi

Industria, Trantsizio Energetikoa eta Jasangarritasun sailburua. (EAJ)

Zarautz, 1974. Hogei urte baino gehiago daramatza enpresa alorrean lanean, atzerrian, batez ere energia sektorean. Erresuma Batuan zegoen orain arte, Centrica PLC enpresako zuzendari. Erresuma Batuko petrolio enpresa handi batean egin zuen lan.

Javier Hurtado

Turismoa, Merkataritza eta Kontsumo sailburua. (PSE-EE)

Madril, Espainia, 1981. Bigarren legealdia izango du gobernuan eta ardura berean. Aurrez, foru diputatua izan zen Araban.

Ez daki euskaraz.

Juan Ignacio Perez Iglesias

Unibertsitateak, Zientzia eta Berrikuntza sailburua. (EAJ)

Salamanca, Espainia, 1960. Fisiologian katedraduna, EHUko errektorea izan zen 2004tik 2008ra. Kultura Zientifikoko Katedraren koordinatzailea da EHUn, eta Zientzia Kaiera dibulgazio atariaren arduraduna.

Denis Itxaso

Etxebizitza eta Hirigintza sailburua. (PSE-EE)

Donostia, 1975. Aurpegi ezaguna EAEko politikagintzan, bi hamarkada baino gehiago baitaramatza kargu instituzionaletan, PSE-EEri loturik. Oraintsu arte, Espainiako Gobernuaren ordezkaria izan da EAEn.

Nerea Melgosa

Ongizatea, Gazteria eta Erronka Demografikoaren sailburua. (EAJ)

Gasteiz, 1970. Urkulluren azken legegintzaldiaren amaiera partera sartu zen gobernuan, Berdintasun, Justizia eta Gizarte Politika sailburu izatera.

Alberto Martinez

Osasun sailburua. (EAJ)

Trapagaran, 1964. Hogei urte baino gehiago daramatza Gurutzetako Ospitaleko Anestesiologiako zerbitzuburu karguan. Osakidetzako 2018ko EPE irregularrean tribunalburu izan zen.

Susana García

Mugikortasun jasangarriaren sailburua. (PSE-EE)

Donostia, 1969. Alderdian ibilbidea egina duen pertsonetako bat. Gipuzkoako batzarkide izan da aspalditxotik.

Amaia Barredo

Elikadura, Nekazaritza Garapena eta Arrantza sailburua. (EAJ)

Donostia, 1970. Elikagaien Zientzian eta Teknologian lizentziaduna, gaiari loturiko arloetan aritu da ardura postuetan. Tapiaren sailburuorde izandakoa, aurrez Elikagaien Kalitateko zuzendari, eta egun Arabako foru diputatua da. Euskadiko Fiskaltzak ikerketapean dauka, ustezko prebarikazio kasu bategatik.

María Jesús San José

Justizia sailburua.

Sestao, 1966. Aurpegi ezaguna PSE-EEn. Patxi Lópezen gobernuan Idazkaritzako zuzendaria izan zen, eta Lan eta Justizia sailburua Urkulluren bigarren agintaldian.

Ez daki euskaraz.


Kanal honetatik interesatuko zaizu: Euskal Autonomia Erkidegoko politika
Ikasmateriala erosteko familientzako laguntzak DBHko bigarren ziklora zabaldu ditu Jaurlaritzak

DBH 3 eta 4. mailako ikasleek datorren ikasturtean beharko dituzten ikasmaterialak diruz lagunduko ditu Eusko Jaurlaritzak lehenengo aldiz, EHIGE Euskal Herriko Ikasleen Guraso Elkartearen aldarrikapen historikoari erantzunez. Seme-alabak maila horietan dituzten familiek, beraz,... [+]


Hamar urtetan EAEko ikastetxeen %20 ixteko arriskua dagoela ohartarazi dute

EAEko ikasleen erdiak baino gehiagok eskola partikularrak jasotzen dituela eta jatorri migratzaileko ikasleak gehien segregatzen dituen Espainiako Estatuko bigarren erkidegoa EAE dela ere adierazi du Esade EcPol erakundeko Lucas Gortazarrek, EHUren udako ikastaroetan.


69 milioi bidaia ordaindu ziren iaz Gipuzkoako Mugi txartelaren bitartez

2022an baino 12 milioi ordainketa gehiago egin ziren, eta inoizko datu hoberenak lortu ditu 2023an. Gipuzkoan bizi diren emakumeak izan ziren Mugi sistema gehien erabili zutenak, eta gehienbat hiri-autobusen erabilera gailendu zen. Pasaiako txalupako eta Loiuko aireporturako... [+]


Gorbeialdeko makroproiektu energetikoen aurkako milaka helegite aurkeztu dituzte Jaurlaritzan

Zigoitian 100 hektareako parke fotovoltaikoa eraiki nahi du Solariak, eta eskualdea gurutzatuko luke oso goi tentsioko linea batek ere. Urkabustaiz, Zigoitia eta Zuiako bizilagunek herritarren 5.540 helegite aurkeztu dituzte ingurua “mehatxatzen duten proiektuak gelditzeko... [+]


Hezkuntza Sailean, euskara eskubide?

Ekain amaieran, Hezkuntza Sailak ehunka irakasle funtzionario izendatu ditu: praktikaldia egitea falta dute, bai eta, irailetik aurrera, mediku-azterketa ere.

Azkeneko deialdian, mediku-azterketa azpikontratatu egin zuen Hezkuntza Sailak. Azpikontratatu zuenean,... [+]


Arartekoaren justizia errestauratibo bidez konpondu dute arrazakeria gatazka bat, epaitegira jo gabe

2023ko irailean, jatorri senegaldarreko hiru pertsonari Gasteizko gaueko aisialdirako lokal batera sarrera ukatu zieten. Diskriminazioa jasan zutenak eta lokaleko jabea Arartekoaren egoitzan bildu dira, eta akordio batera iritsi dira.


2024-07-02 | Axier Lopez
Palestinaren eta islamaren aurkako margoketak egin dituzte Azpeitian

Azpeitian Palestinari elkartasuna adierazteko mural batean mezu islamofoboak margotu dituzte. "Palestina Akatu" eta Islama minbiziarekin parekatzen duten pintaketak dira. Elkar-ekin mugimenduak salatu du ekintza.


Aro ustez berri bat, bi liburu aurkezpen eta hiru jaka

Udaberriko azken egunean, ikusmin handia Gasteizko Legebiltzarrean. Nonbait juntatu bada jende frikia, hemen izan da. Baina aspaldian ez bezainbeste jende dago, eta zerbaitegatik da hori. Hedabideetako 300 profesional, ez alferrik. Hamabi urteren ostean, bi boxeolariak berriak... [+]


Zubietako erraustegia kudeatzen duen enpresari zigorra jartzeko eskatu du Nafarroako Gobernuak

Artaxoako Ecofert enpresara baimendu gabeko hondakinak eramateagatik, Zubietako Ekondakin enpresari zigor-espedientea abian jartzeko eskatu dio Nafarroako Gobernuak Eusko Jaurlaritzako Ingurumen Sailari. Jose Maria Aierdi Nafarroako Ingurumen kontseilariak jakinarazi duenez,... [+]


Gerrak sortzen dituen euskal industria militar berria: Satlantis-en adibidea

Duela ia urte eta erdi, Ahoztar Zelaieta kazetariak Satlantis enpresaren aurpegi ezezagunena ekarri zuen argitara. Azkenaldian berrikuntza teknologikoaren alorrean sortzen ari diren euskal enpresen izar gisa aurkezten zaigu Satlantis; baina El Salto-k argitaratutako La empresa... [+]


Eguneraketa berriak daude