Igandean egin duten plebiszituan, txiletarren erabaki dute Augusto Pinocheten diktadura garaietatik oinordetzan jasotako konstituzioa ezeztatzea eta berri bat sortzea. Bozkatzera deitutako 14,7 milioi herritarren artetik, %50a baino gehiagok eman du botoa. Emaitza: %78k aldaketaren alde egin du bozka, eta %79ak babestu du herritarrek hautatutako 155 pertsonak osatutako batzorde batek idaztea konstituzio berria.

155 pertsona horiek apirilaren 11an aurkeztuko dituzte, eta konstituzio berria hautetsien bi herenek onartu beharko dute. Galdeketak atea ireki die egiturazko aldaketa politiko eta ekonomikoei.

Kaleko protesta eta mobilizazioen eskutik heldu da konstituzioaren gaineko galdeketa. Iaz gobernuaren eta politika neoliberalen aurka eztandarazitako protestak baretu asmoz, 2019ko azaroaren 15ean gobernuak eta oposizioak erabaki baitzuten galdeketa egitea. Hasiera batean apirilean ziren galdeketa egitekoak, baina pandemiaren ondorioz urrira atzeratua izan da.

Ezkerreko oposizioak babestu egin du aldaketa, eta Chile Vamos eskuineko koalizioa zatituta agertu da. Sebastian Piñera gobernuburuak, bere aldetik, ez du publiko egin plebiszituarekiko bere postura, eta gobernukideei eskatu die ez parte hartzeko aukera baten eta bestearen aldeko ekitaldietan.