Espainiako politikarekiko haserrea boto abertzale bilakatzea proposatu zuen Andoni Ortuzarrek Alderdi Egunean bildutakoen aurrean. Horri erantzunez, PPko presidente Pablo Casadok adierazi du mezu baztertzailea dela jeltzaleena, “RH negatiboa eta Sabino Aranaren moduko supremazistak” oinarri dituena.

Nazionalismoa beste garai bateko ideologia dela argudiatu du popularrak, bere ustez EAEn jaio den orok "euskal herritar, espainiar eta europar" sentitu behar du bere burua. Euskal Herria –Pais Vasco darabil Casadok– ez dela inoiz independentea izan, eta ez dela sekula izango, gehitu du. "Nire semeak mundu globalizatu batean bizi dira eta leku askotako jendearekin txateatzen dute, Kanadakoak, Australiakoak… Nola da posible Burgosetik Gasteizera muga bat jarri nahi izatea?".

Euskal herritarrak espainiar sentitu behar direla argudiatzeko, orain bost mende Magallaes portugesak abiatu eta Joan Sebastian Elkano getariarrak burututako espedizio armatua ekarri du gogora. Elkano ikur gisa erabili du euskal herritarrak espainiar izatearen "harrotasuna" irudikatzeko: "Baina zer Euskal Herriaz ari da hizketan Ortuzar jauna, Elkanok orain dela bost mende bandera nazionala hartuta munduari buelta eman zion eta".

1519an Gaztelako erresumaren ordaindupean aritu zen Joan Sebastian Elkano eta haren interesen zerbitzura egindako espedizio horietako batean eman zion bira munduari. Baina XVI. mendean Casadok gogoan dituen nazioa eta bandera ez ziren existitu ere egiten.