Oposizioetako iruzurraren ondoren, bi dimisiorekin hasi du urtea Osakidetzak
Ricardo Ituarte Osakidetzako arduradun ekonomikoak eta Juan Carlos Soto giza-baliabideetako zuzendariak euren karguak utzi dituzte 2019ko lehen zazpi egunetan. Kargugabetzeek ez dute esplikazio ofizialik, baina biek izan dute loturaren bat iazko enplegu eskaintzan detektatutako iruzurrarekin.
Orain arte Osakidetzako arduradun ekonomikoa izan den Ricardo Ituarteren anaiak parte hartu zuen iazko enplegu eskaintza polemikoan. Bera izan zen ezohiko emaitza lortu zuen pertsonetako bat, 100 puntu eskuratu zituen azterketa praktikoan eta Anestesia kategorian plaza eskuratu zuen.
Hain zuzen espezialitate horretako azterketa izan zen iazko Osakidetzako oposizioetan iruzurra izan zela pentsatzeko zantzuak eman zituen lehenbizikoetakoa eta Osakidetzak berak agindu zuen kategoria horretako hautapen-prozesua errepikatzeko, nahiz eta orain behin behinean geldituta dagoen bigarren azterketa hori.
Astelehen honetan Osakidetzaren administrazio kontseiluak kargutik kendu du Ricardo Ituarte eta José Ramón Calonge jarri du haren ordez alor ekonomikoaren buru.
Ituarte EAJko kidea da eta Santurtziko alkate ohia. Iturri ofizialek ElDiario.es-i azaldu diotenez, ez du harremanik izan Osakidetzako enplegu eskaintzaren kudeaketan.
Giza-baliabideen zuzendaria ere Osakidetzatik kanpo
Urte hasiera albiste ugari ematen ari da Osakidetzan. Urtarrilaren 3an jakinarazi zuen EAEko osasun zerbitzuak Juan Carlos Soto kargugabetu duela, Osakidetzako giza-baliabideetako zuzendaria.
Ituarteren kasuan ez bezala, Sotok izan zuen harremanik iruzurragatik jo-puntuan dauden azterketekin, bera izan baitzen azterketen prestakuntzaren arduraduna, baita salaketen ondorengo ikerketarena ere. Sotok ez zituen hasieran iruzur salaketak aintzat hartu eta albistea hedabideetara iritsi zenean erreakzionatu zuen.
María Pilar Uriartek ordezkatu du Soto giza-baliabideetako arduradun nagusi gisa.
Erradiodiagnostikoko teknikari espezialistaren eta farmaziako laguntzailearen deialdietan hainbat galdera baliogabetu dira. Horiekin batera, joskintzako ofizialaren eta teknikari informatikoen azterketetan arazoak azaldu dira.
Arabako Auzitegiak atzera bota du LABen errekurtsoa. Hala ere, sindikatuak “aukerak” ikusten ditu epaiketa baterako.
Sindikatua pozik agertu da epaileak ikerketa sei hilabetez luzatzea onartu duelako, baina autoari ebazpena jarriko dio "autoa hobetzeko eta defentsen ekintzak baliogabetzea eragozteko".
3.535 lanpostuko eskaintza egiteko asmoa adierazi du Gotzone Sagardui Osasun sailburuak. ELA sindikatuak, ordea, kritikatu du behin-behineko langileak 24.600 direla eta ez dela “arazoa konponduko”. 9.000 langilek gutxienez zortzi urte daramate aldi baterako... [+]
LAB sindikatuak irailaren 1ean egin zuen eskaera auto bidez. Instrukzio auzitegiak Darpón eta Mugika aztertzea errefusatu du, baina hainbat espezialitatetako beste bederatzi kide ikertuko ditu. Auzia 2022ko urtarrilaren 29ra arte luzatuko da.