ARGIA.eus

2022ko abuztuaren 09a

Mugimendu feministak zaintza lanak kudeatzeko krisi mahaia eratuko du

  • Astelehenean eman du asmoen berri mugimendu feministak. Krisi mahaian parte hartzera gonbidatu ditu EAEko eta Nafarroako Gobernuak, Ipar Euskal Herriko Elkargoa, sindikatuak eta alderdi politikoak; 48 orduko epea luzatu die erantzuteko.

Zaintza lanak bistaratzeko ekintza, 2019ko martxoaren 8ko greba feministaren testuinguruan (Argazkia: Ecuador Etxea)
Amaia Lekunberri Ansola @amaialekunberri
2020ko martxoaren 16a

Euskal Herriko Mugimendu Feministaren izenean mintzatu dira Josebe Iturrioz eta Silvia Rugamas bideo bidez astelehen goizean. Mugimendu feminista koronabirusak eragindako egoeraren aurrean dauzkan erantzukizunen kargu egiteko prest dagoela adierazi dute, “egoera leheneratzeko” xedez. Helburu horri begira, zaintza lanak kudeatzeko krisi mahaia eratzea erabaki du mugimenduak, eta mahaia osatzera dei egin die EAEko eta Nafarroako Gobernuei, Ipar Euskal Herriko Elkargoari, sindikatuei eta alderdi politikoei. Behin interpelazioak eginda, 48 orduko epea eman die erantzuteko. “Krisi honetan errealitatea abiadura handian doa, eta ez dugu denborarik galtzeko”, argudiatu dute.

Erantzun indibidualez harago, kolektiboki antolatzeko beharra azpimarratu du mugimenduak: “Une honetan alarma egoera ezarri da, eta ixtea eta konfinatzea agindu da, baina ez dago gobernu neurririk erantzun kolektiboa emateko. Gogorarazi nahi dizuegu ezetz, nahiz eta gure etxeetan konfinatuta egon, antolaketak kolektiboa izan behar duela”. Hori horrela, krisi mahaia ere etxeetatik eta bide telematikoetatik bideratuko dela azaldu dute, bertan parte hartuko dutenen osasuna bermatzeko. Mugimenduaren arabera, mahai horretan egon beharko lukete, baita ere, orain arte erabakiak hartzerakoan bazter utzi dituzten gizarte eragileak: mugimendu feminista, langileen elkarteak, etxeko langileak, guraso elkarteak edo egoitzetako langileak kasu. Mahaiaren zeharkakotasuna eta kalitate teknikoa ziurtatzeko, zaintza, medikuntza eta ekonomia arloko adituen parte hartzea bermatuko duela hitz eman du mugimenduak.

“Prest gaude eragile politiko transzendental gisa dagokigun erantzukizuna gure gain hartzeko”, azpimarratu dute, argi utziz mugimendu feministak ez duela bere agentzia politikoa beste norbaiten esku utziko. Argi mintzatu dira: “Gu gara zaintzari buruz dakigunak, eta krisi hau, pandemia deitzen dioten arren, zaintza krisi bat da. Estatuek eta gobernuek zaintzaren dimenstio estrukturala ikusteko duten ezintasuna kezkagarria da”.

Paradigma aldaketaren beharra

“Urteetan hizpide izan dugun zaintza krisia agerian geratu da egunotan COVID-19 birusaren pandemiarekin (…) Ez da koiunturazko zerbait; zaintza krisia egiturazkoa da”. Hori horrela, luzez errepikatutakoa berriz azpimarratu du mugimendu feministak: bizitzak erdigunean jarriko dituen jendarte bati bide emateko, paradigma aldaketa beharrezkoa dela. “Orain arte gure jendartea merkatuetan eta logika neoliberaletan zentratuta bizi izan da eta orain egiaztatzen ari gara ez gaudela prest bizitza, pertsonen bizitzak, babesteko”, egin dute irakurketa.

Paradigma berarekin jarraituko baldin badugu, krisi honetatik ateratzeak ez duela ezertarako balio adierazi dute: “Egoera honetatik aterako gara bakarrik logika kapitalista eta patriarkal horiek aldatzeko gai bagara, bizitzak eta zaintzak erdigunean jartzeko gai bagara”.

Argi utzi dute aterabidea “elkarrekin” antolatuz lortu daitekeela soilik, eta horretarako ezinbestekotzat jo dute antolaketa soziala eta botere publikoek interlokuzioa izatea zaintzaren eta bizitzaren iraunkortasunaz arduratzen diren eragileekin.

Hartutako neurrien aurrean, hamaika ardura

Alarma egoeraren aurrean hartu diren neurrien aurrean hainbat ardura identifikatu ditu mugimendu feministak, eta horiek presente izan nahi ditu krisi mahaian. Ardura horietako bat da indarkeria matxista, jakin badakitelako indarkeriak ez duela berrogeialdirik egingo; are gehiago, larriagotu egin daitekeela ohartarazi dute, indarkeria pairatzen duten emakume askok beren erasotzaileekin egin beharko duelako itxialdia. Ildo horretan, azken astean Euskal Herrian hildako emakumeak gogoratu dituzte agerraldian.

Bestalde, beste hainbat neurriren aurrean ere kezka agertu du mugimenduak, “krisia areagotu dezaketelakoan”. Besteren artean, ondoko kezkak aipatu dituzte: jendea etxean ari dela geratzen, jakin gabe zein diren konpentsazio ekonomikorako neurriak, baldin eta halakorik egongo bada; erresidentzietan jende gehiago sartzea ukatu arren, menpekotasuna duen jendea nola zaindu azalpenik eman ez dela; osasun eskubiderik ez duten migratzaileen kasuan zer gertatuko den, jakitear dela; eta etxe barruko langileek haien jardunarekin jarraitu dutela, kutsatuak izatera arriskatuz.

Mugimendu feministaren adierazpenak, euskaraz:

 


Covid-19 eta erantzun soziala kanaletik interesatuko zaizu...
2022-02-15 | Estitxu Eizagirre
Pediatrek ikastetxe barruetan maskarak kentzea eskatu dute, modu progresiboan

Katalunian Societat Catalana de Pediatria elkarteak pandemia kontrolatzeko ikastetxeetan aplikatzen diren neurriak bertan behera uzteko eskatu du, neurri horiek haurrengan dituzten ondorio kaltegarriak argudiatuz. Tartean dago gela barruetan maskararen erabilera kentzea, modu... [+]


Bizitza

Beste hainbat bezala COVID pasearen aurka Bilbon deituta zegoen manifestaziora joan ginen aurrekoan. Bertan adin, kolore, janzkera eta hizkera askotariko zenbat jende zegoen ikusteak asko poztu ninduen, eta tartean topatu nituen unibertsitate garaiko batailetako lagunak edo... [+]


2022-02-01 | Estitxu Eizagirre
Covid pasaportearen auzia Zarauzko Udaleko osoko bilkurara eraman dute hainbat herritarrek

Zarauzko Udaleko urtarrileko osoko bilkuran, galdera erantzunen txandan sei herritarrek hartu zuten hitza, eta Covid pasaporteak eragindako diskriminazioa eta beren bizipenak azaldu zituzten; tartean, pasaporterik gabe kiroldegira sartzeagatik atxilotuta bukatu zuen... [+]


2022-01-24 | Garazi Zabaleta
Lurre Hurre
Migratzaileak nekazaritzan trebatzeko proiektua Bermeon

Bermeon jaiotako eta bertara etorritako herritarren artean hilean behin egiten zuten tertulia dago Lurre Hurre proiektuaren oinarrian. Elkar ezagutu zuen herritar talde horren harremanetik abiatuta, eta konfinamendu garaian migratzaile askok bizi zuten egoeraz jabetuta, egitasmo... [+]


2022-01-11 | Joseph Andras
Pase poliziakoa: ezkerraren amore emate bat

Joseph Andras (Le Havre, Frantzia, 1984) idazlea da. 2016an lehen eleberriagatik "Goncourt" sari famatua eman zioten, baina berak uko egin zion epaimahaiari esanda “lehia, konkurrentzia eta norgehiagoka arrotzak zaizkiela idazketari eta sorkuntzari”... [+]


Irakurrienak
Argia buletina
Egunaren laburpena
zure e-postan
Eguneraketa berriak daude