Langileen bi aldarrikapen nagusietako bat onartu du enpresak –seigarren gauari uko egitea–, baina ez bigarrena –soldataren igoera KPIaren araberakoa izatea–. ELA, LAB eta ESKk asteazkeneko greba eta asanblada mantentzen dituzte. Aurreakordioa astelehenean bozkatuko da erreferendumean.
Luze joan da astearteko bilera, zortzi orduz luzatu ziren negoziazioak. Hasiera batean sindikatu guztiek batera aurkeztu diote proposamen bat enpresari, besteak beste 2021 eta 2022 urteetarako soldata igoerak jasotzen zituena. Zuzendaritzak ez du onartu, eta UGT, CCOO, Ekintza eta PIM sindikatuek beste proposamen bat egin dute eta enpresak onartu du. Hauek dira aurreakordioaren puntu nagusiak:
- Gaueko txandan sei gauez jarraian lan egiteko aukerari ez.
- 500 euroko ordainsari ez-finkagarri bat hitzarmena sinatzean.
- 4.000 euroko ordainsari ez-finkagarria 2021 urterako.
- %6ko soldata igoera finkatua 2022rako.
- Urteko %2,25eko igoerak 2023-2026 aldirako.
Greba eta asanblada
Aurreakordioa onartu ez duten ELA, LAB eta ESKk iragan astean deitu zuten greba aste honetako asteazken, ostegun eta ostiralerako. “Ikusirik ELA, LAB eta ESKk plantillarekin hartutako konpromisoak ez direla betetzen, greba eta asanblada mantentzen dira”, iragarri dute astearte iluntzean zabaldutako oharrean. Zuzendaritzak seigarren gauari “letra txikirik gabe” uko egitea “plantillaren mobilizazioari esker” lortu dela txalotu dute, baina azpimarratu dute aurreakordioak ez duela KPIaren araberako soldata igoera jasotzen, eta hortaz “langileen eros ahalmena bermatu gabe” jarraitzen duela. Asteazken goizean langileen asanblada deitu dute, eta bertan erabakiko da zer egin ordutik aurrera.
Astelehenean erreferenduma
Erreferendumean onartu edo baztertuko dute langileek aurreakordioa, uztailaren 18ko astelehenean. Aurreakordioa sinatu duten sindikatuek ordezkaritzaren %55 dute, sinatu ez dutenek %45, baina azken asteetako grebek jarraipen ia erabatekoa izan dute, gutxiengoa duen blokeak soilik deitu baditu ere. Akordioaren edukiak ez ezik, hurrengo egunetan gertatzen denak baldintzatuko du ziurrenik erreferendumaren emaitza.
Aste honetan egiten ari dira lanuzteak, lan-baldintzetan hobekuntzak exijitzeko. Aurreko hiru hilabeteetan ere izan dituzte grebak.
Gaur, apirilak 16, Eusko Jaurlaritzari eta Industria Sailari beren industria-politikan jarrera aldaketa bat exijitzeko manifestazioa egin dute Bizkaiko 60 industria-enpresa inguruk Mecaner enpresako langileakaz batera, Bilbon. Adierazi dute "hitzetatik ekintzetara"... [+]
LABek jakinarazi duenez, martxoaren 14an materiala garraiatzen ari zela zama gainera erori ondoren larri zauritutako langilea zendu da asteartean. Jadanik hamazortzi lagun dira urtea hasi zenetik lanean hildakoak, sindikatuaren arabera, eta lan istripuen "gorakada... [+]
Langileen aldarrikapenak eztabaida politikoaren erdigunera eraman, eta aldaketa soziopolitikoa lortzeko "eragile aktibo" izanen dela nabarmendu du LABek 50. urteurreneko ospakizunean.
500 lagun batu dira Baionan buruturiko manifestazioan. Sektore publikorako erreformarekin Frantziako Gobernuak sektore pribatuko logika funtzionarioen baitan txertatu nahia salatzeko mobilizazioa ere izan da.