Lincolnen estatuaren inguruan bildu ziren manifestariak eta AEBetako eskubide zibilen aldeko aldarriak egin zituzten. 1963ko abuztuaren 28an hitz egin zuen Luther Kingek eta data horren inguruan beste hainbat ekitaldi ere egingo dituzte, tartean abuztuaren 28an, asteazkena, Barack Obama AEBetako presidentea diskurtso bat emango du Bill Clinton eta Jimmy Carter presidente ohiekin batera.

Iragan urtean Floridan hil zuten Trayvon Martin 17 urteko mutiko beltzaren argazkiak ere ikusi ahal izan ziren martxan zehar, eta bere amak hartu zuten hitza ekitaldian: “ez da nire semea bakarrik, guztion semea da, eta denok daukagu umeak babesteko betebeharra”.

BBCk elkarrizketa egin die Trayvon Marinen gurasoei, eta hedabideari esan diote ez dutela beren semearen kasu judiziala euren bizitza definitzeko erabili nahi, baina borrokan jarraituko dutela.

Martin Luther King

Martin Luther Kingek hasitako mugimendu baketsuak Estatu Batuetan ordura arte gehienbat beltzen kontra izandako injustizia sozialen protestak eta ezinegona bideratu zituen. “Askatasun eta lanaren martxa” izenez abiatutako 1963ko abuztuaren 28ko martxaren amaieran Luther Kingek berak emandako diskurtsoa egin da ezagun, eta ondorengo urteetako dinamika aldatu zuen herrialdean. Eskubide Zibilen Legea (1964) eta Boto Eskubiderako Legea onartzea lortu zuten, eta gutxiengoen bazterketa debekatzeko araudiak ere diseinatu zituzten.