2021eko apirilaren 21a
Hamabost urte eman ditu kartzelan preso hernaniarrak. Bere familiak auto-istripu larria jasan zuen 2017an, Castellóko espetxera bidean.
Marta Igarriz Izeta euskal preso politikoa Logroñoko espetxetik irten berri da, senideen eta lagunen harrerapean. Hala jakinarazi du Naiz atariak.
Duela bi urte lekualdatu zuten Errioxako espetxera, izan ere, aurretiaz Castellón egon zen preso, hamaika urtez. Bere senitartekoak auto istripu bat jasan zuten bertara bisitan zihoazela, 2017ko Gabonetan. Igarrizen amak saihets-hezurrak eta zerbikaletako orno bat hautsi zituen, eta beste bi zapalduta geratu zitzaizkion. Izebak bularrezurrean kalteak jasan zituen, eta bere ahizpak, aldiz, hainbat kolpe.
Ostera, bigarren graduan sailkatu eta Logroñora eraman zuten Igarriz. Geroztik, zenbait kartzela-baimen izan ditu. Ez diote baldintzapeko askatasunik eman izan nahi ordea, zigorraren hiru laurdenak gainditu arren. Gauza bera gertatzen zaie 2020an bertan askatuak izan behar luketen beste 80 euskal preso politikori.
Espainiako Poliziak 2005ean atxilotu zuen Hernanin, orduan Espainiako Audientzia Nazionaleko epaile zen Fernando Grande-Marlaskaren zuzendaritzapeko sarekada batean. Bi urte beranduago, epaitua eta kondenatua izan zen, ETAren "Donostia konplexua" delakoaren aurkako ahozko saioan. Besteak beste, Martuteneko kartzelan duela gutxi hil den Igor González Solarekin batera galdekatu zuten.
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
