Blanca Urgell Eusko Jaurlaritzako Kultura sailburuak Debako (Gipuzkoa) Praileaitz kobazuloa babesteko dekretu berriaren inguruko azalpenak eman zituen ostiralean Eusko Legebiltzarrean. Sasiolako harrobiko langileek ezingo dute leherketarik egin leizezuloaren sarreratik 65 metro baino gertuago. Gainera, sarreratik 65 eta 130 metro bitartean, leherketarik eginez gero, bi metro zabaleko lubaki bat egin beharko lukete, sakonera eta angelu zehatzekoa, eta sistema mekanikoak erabilita. Jesus Mari Larrazabal EAko legebiltzarkideak lubakiaren gaineko zalantzak plazaratu zituen: "Esaten dutenez, nahiz eta lubakia egon eta orientazioa ona izan, leherketa egiteko, dardarak hala ere pasa litezke lur azpitik, eta afektatu kobazuloa".