Jose Ramon Lopez de Abetxuko euskal preso ohiak hitzaldia emango du astearte eguerdian, 12:30etan, Gasteizko EHUren campuseko ikasgela batean. “Larriki gaixo dauden presoak etxera” du izenburu Abetxukok Txema Matanzas abokatuarekin batera emango duen hitzaldiak, eta Sarek antolatu du; ikasle talde batek hala eskatuta, azaldu dutenez.

Covite indarkeriaren biktimen elkarteak hitzaldia bertan behera utz zezan eskatu zion EHUri larunbatean, beren ustez “oso larria” delako Abetxukok hitzaldia ematea. Debeku eskaera egiteko argudiatu zuten Abetxuko polizia bat hiltzeagatik egon zela preso, eta ezin zuela “erreferente” gisa agertu ikasleen aurrean.

EHUk ez du Coviteren eskaera onartu. Auziari buruzko ohar batean “ideia eta sentsibilitate politiko guztien adierazpen askatasunarekin duen konpromisoa” argudiatu du. Erabakiaren aurrean, Covitek kritika egin dio EHUko errektore Nekane Balluerkari, unibertsitatean “hiltzaile bati” toki egiteagatik.

Iskanbila tarteko, Sarek agerraldia egin zuen astelehenean. Biktimekiko erabateko errespetua agertu eta horiek “modu alderdikoian” erabili ez daitezela eskatu zuen. Adierazpen askatasuna mugatzeko eskubiderik inork ez duela adierazi zuen, eta hitzaldian hizpide izango den gaiak sortutako arrabotsa ulertzen ez duela adierazi, aurretik ere larriki gaixo dauden presoen gaia jorratu izan delako hainbat instituzioetan. Ildo horretan, Sortuk adierazi du “sufrimendu jakin bat” estali nahi dela.

Hitzaldiaren aurkako elkarretaratzea

EHUk hitzaldiarekin aurrera egiteko erabakia hartuta, aurka daudenak elkarretaratzea deitu dute. Esteban Garibai elkarteak egin du Gasteizko campusean biltzeko deialdia, hitzaldia baino ordu lauden lehenago, 12:15etan. Berriako Igor Susaeta kazetariak jakinarazi duenez, Jesus Loza Espainiako Gobernuaren EAEko ordezkaria ere hitzaldiaren aurka agertu da.