Loiolako kuartelen lursailak erosteko akordioa lortu du Donostiako Udalak Espainiako Gobernuarekin

  • Donostiako Udalak eta Espainiako Defentsa Ministerioak akordioa egin dute, eta urte amaierarako edo 2023 hasierarako sinatzea espero dute. Beste lau urtez bizi ahalko dira militarrak kuartelean. Uliako sei hektarea ere bereganatuko ditu udalak. Lur eremu horietan etxebizitza egitea aurreikusi dute eta ekipamendu publikoak egingo dituztela ere esan dute. Espainiako militarrak kuartel berria eraikiko dute auzo berean, egungo lekutik 200 metrotara. 


2022ko azaroaren 15an - 15:41
Loiolako kuartelen lursailak erosiko ditu Donostiako Udalak.

Donostiako Udalak Loiolako kuartel militarren lursailak 73,3 milioi eurogatik erosiko ditu. Hori adostu du Defentsa Ministerioarekin, asteartean Eneko Goia alkateak eta Nekane Arzallus Hirigintza zinegotziak jakitera eman dutenez, eta akordioa urte amaierarako edo 2023 urte hasierarako sinatzea espero dute. Hala ere, militarrak beste lau urtez bizi ahalko dira kuartelean. Epe luzera begira, beraz, 1500-1700 etxebizitza egitea aurreikusi du udalak, besteak beste.

Zehazki 73.323.373,38 euro ordainduko dizkio udalak Defentsa Ministerioari, eta ondorengo lurrak bereganatuko ditu: Loiolako kuartelen lursaila eta ondoan dauden beste bi instalazio militar –orotara 17,5 hektarea– ; eta Ulian Defentsako Ministerioarenak diren hainbat landa eremu –6 hektarea–.

Hala ere, egungo Loiolako kuarteletik 200 metrotara beste lursail bat militarizatuko dute, Real Sociedad Hipika inguruko eremuan hain zuzen. Beraz, 500 militarrek Donostian jarraituko dute. 

Udalak bost milioi euro aurreratu beharko ditu akordioa sinatzerako orduan –urte amaieran edota 2023 hasieran–, udal aurrekontuetan zehaztuak zeudenak. 65 milioi jabetzeko eskritura sinatzen denean ordaindu beharko du, eta hori akordioa sinatu eta sei hilabetetara egingo dela aurreikusi dute. Azken hiru milioiak salerosketaren amaierarako utziko dute, Defentsa Ministerioak alokairuan dituen eraikin batzuen eskualdatzea orduan egingo baitute, bertan bizi diren militarrek lekualdatzea dela-eta.

Goiak azaldu du “esfortzu handia” dela erosketa hau, eta epe luzerako zorpetu beharko dela. “2022ko aurrekontuaren likidazioa, otsailean izango duguna, positiboa izatea aurreikusten dugu, eta likidazio hori operazio honetan aplikatu ahal izatea”, jaso du Irutxuloko Hitzak.

Dagoeneko hasi dira eremu berrirako diseinua aurreikusten. Loiolako lurretan 1.500-1.700 etxebizitza egiteko asmoa agertu dute, baina alkateak argitu du zifra horiek aldatu daitezkela tramitazioak iraun bitartean.

Bestalde, EAEko Auzitegi Nagusiak, Vox alderdiaren helegitea onartuta, uztailean ebatzi zuen kuarteletako Maria Teresa eta Princesa Mercedes eraikinak ezin direla erauntsi. Ebazpenari helegitea jarri zion udalak, baina oraindik Espainiako Auzitegi Gorenean prozesua egiten ari da. Hortaz, eremu horietan ekipamendu publikoak egingo dituztela esan dute udaleko ordezkariek.

Lurren plangintzaren xehetasun gehiago eman ditu alkateak: Urumearen gertutasunagatik, lurra 2,75 metro igo beharko dute etxebizitzak egiteko; ibai parke bat egingo dute; bi zubi berri eraiki beharko dituzte; Urdintzuko zubia botako dute, ibaiarentzako oztopoa baita dituen zutabeengatik; eta Lorategi Hiriaren parean oinezkoentzako pasabide bat eraiki beharko dute, Loiolako kuartelen auzune berria Loiolako topoaren geltokiarekin lotzeko.

Uliako lurrei dagokienez, parke naturalaren barruan sartuko direla adierazi du Jon Txabarri Hirigintza saileko zuzendariak. Bost partzelatan banatuta daude sei hektarea horiek; batzuk 1.000 metro koadro ingurukoak eta beste batzuk 32.000 metro koadro ingurukoak, besteak beste. Uliako gotorlekuaren eremua eskuratuko du udalak.

Salerosketa 2020an EAJk Espainiako Gobernuarekin adostutako akordio baten harira egin dute. Jeltzaleek Espainiako Aurrekontu Orokorrak babestearen ordainetan, kuartelak udalaren esku utziko zituzten. Orduan onartu zen kuartel berria egitea Loiolako hipikan. 


Kanal honetatik interesatuko zaizu: Militarismoa
Nola obedituko diot eroari

1997. Aguraingo Intsumiso Eguna. Antimilitarismoak milaka lagun biltzen zituen bere ekimenetan, artxibotik berreskuratu dugun argazki honetan ikusten den moduan. Aurten 30 urte beteko dira Intsumiso Eguna ospatzen hasi zirela.


Gerra danbor hotsak Europako Batasunean

Urtebete pasa da Mendebaldeari Ukrainako gerra okertu zitzaionetik. Xakean esaten da jokalari bat zugzwang posizioan dagoela egin dezakeen edozein mugimenduk kaltetuko badu. Mugimendurik egin beharko ez balu berdinketa lortuko luke, baina bere txanda bada, bereak egin... [+]


Israelgo Armada hornitzen duten petrolio konpainiak, gerra krimenen konplize?

Israelek 2023ko urrian Gazako sarraskia hasi zuenetik, petrolioa jasotzen aritu da itsasoz munduko txoko askotatik, petrolio enpresa handienek hornituta. Petrolio horren zati bat armada hornitzeko erabiltzen da palestinarren kontrako erasoekin segi dezan.


Bonbak eta munizioa jaurtiko dituzte aste guztian Bardeako tiro poligonoan

Herrialde askotako hegazkinak izanen dira Bardean gerrarako ariketa militarrak egiten. Benetako bonbak eta munizioa erabiliko dituzte horretarako. Aste osoan izanen dira lan horietan eta Poligonoaren Aurkako Asanbleak zalantzak ditu segurtasuna ziurtatuko ote duten... [+]


Eguneraketa berriak daude