Donostian, Tolosan eta Baionan filmatuko du, zazpi astetan –Donostiako La Cumbre jauregian, hain zuzen ere bi gazteak torturatu zituzten lekuan, ezingo du grabatu, baimenik ez diotelako eman–.

Antzezleei dagokienez, argitara eman da jada pantaila handian azalduko diren aktoreen zerrenda: Unax Ugaldek izango du paper garrantzitsuenetako bat, Iñigo Iruin abokatuarena; harez gain, Oriol Vila, Francesc Orella, Aitor Mazo, Pep Tosar eta Ricard Sales aktoreek ere parte hartuko dute.

2.000.000 eurotik gorako aurrekontua du filmak. Joanes Urkixok idatzi du gidoia eta Pascal Gaignerenek sortu du soinu banda. 

Gertatutakoa errealismoz

Malori elkarrizketa egin zion DiarioVascok produkzioaren xehetasunen berri jakiteko, ARGIAn pasarte esanguratsuenak itzuli genituen.

Lasa eta Zabalaren senideek obrarekin izan duten lotura azaldu zuen orduan zuzendariak: “Senideetako batek esan zigun ongi iruditzen zitzaiola filma egitea, baina ez duela ikusteko asmorik. Kezkatu egiten nau benetan gertatutako historia kontatu beharrak eta protagonistek senideak dituztela jakiteak. Hau ez da The Sopranos-en atal bat, benetako zerbait baizik”

Irudi gogorrak saihestuko ez dituela argi eduki zuen hasieratik, ordea: “Historia errealista egin nahi dut. Badakit geroz eta sinesgarriagoa izan, are mingarriagoa izango dela”.