Lanbidek DSBE eta EPO laguntzak kendu dizkio NANa galdu zuen emakume bati
Pasaportea, poliziaren ziurtagiria eta NANaren kopia aurkeztuta ere, Lanbidek ez zizkion paperak onartu. Bazterketa sozial egoera larrian den emakumea diru-laguntza barik uzteko erabakia berrikusteko eskatu dio Arartekoak Euskal Enplegu Zerbitzuari.
Laguntza barik utzi duten emakumeak NANa galdua zeukan, Lanbidek dokumentazio jakin bat aurkeztea eskatu zionean. Emakumea lau alditan joan zen Lanbidek Donostian duen bulegoetako batera dokumentazio osagarria aurkeztera, bai eta NANa zergatik ez zeukan justifikatzera. Lanbidek, baina, aipatu laguntzak kendu dizkio.
Lehen aldian pasaportearekin hurbildu zen bulegora, baina artatu zuen langileak adierazi zion NANa edo poliziaren ziurtagiri barik ez zizkiola paperak onartuko. Bigarren bisitan, poliziaren ziurtagiria eraman zuen emakumeak, baina pasaportea ez eramateagatik atzera bota zuten. Hirugarren aldian, pasaportea, poliziaren ziurtagiria eta NANaren kopia aurkeztu zituen, baina honako honetan ere ez zituzten dokumentuak aintzat hartu, NAN originala ez izateagatik. Laugarren aldian, NAN originala barne, dokumentazio guztia aurkeztu zuen emakumeak, baina epez kanpo, Lanbideren arabera.
Diru-laguntzak moztu dizkioten emakumea bizikidetza-unitate baten parte da, zeinetan bazterketa sozial egoera bizi duten lau emakume bizi diren: birramona, amona, ama eta adin txikiko alaba. Lanbideren diru-laguntzak ziren emakume hauen "oinarrizko beharrizanak asetzeko diru-iturri bakarra 2016ko ekainean".
Arartekoak argi ikusten du emakumeak administrazioarekin aurrean prestutasun jarrera izan duela momentu oro, eta prozesuan zehar demandari erantzuteko zein Lanbideren partetik beharrezko informazioa jasotzeko zailtasunak izan dituela azpimarratu du. Hala bada, Arartekoaren arabera emakumearen kasuan ez dago legea hautsi den momenturik, eta Lanbideren erabakia "larritzat" jo du.
Arartekoak emakumearen larritasun egoeraren adierazle den informazio gehiago eman du: DSBE eta EPO laguntzak behin betiko kendu aurretik, hauek etetean gizarte-larrialdietarako laguntzak jasotzeko eskaria egin zion Donostiako Udalari, baina ukatu egin zioten eskakizuna. Bestalde, lau emakumeen bizilekua den etxebizitzaren jabeak etxegabetzeko demanda judiziala aurkeztu zuen, alokairua ez ordaintzeagatik.
Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.
Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!
Indarkeria matxista pairatu duten emakumeei dagozkien diru-laguntzen aurrean, Lanbidek ezartzen dituen trabak eta murrizketak salatu dituzte Barakaldoko Beurko auzoko Lanbideren bulegoan.
Aipatu kasua kasu isolatua izatetik urruti dagoela azpimarratu dute, eta Lanbidek indarkeria matxista pairatu duten emakumeekiko duen jarrera okerra salatu.
Elkarretaratzea egin dute Eusko Jaurlaritzaren Bilboko delegaritzaren aurrean pobrezia eta murrizketen aurka. Gaur goizean aurkeztu da diru-sarrera bermatzeko errentaren proiektua bozketara.
Pobreziari eta bazterketa sozialari aurre egiteko 51.000 herritarrek sinaturiko proposamena atzera bota zuten EAJ, PSE eta PPk joan den astean, Eusko Legebiltzarrean. Bizitza duina aldarrikatuz eta eztabaida publikoari aterik ez ixteko eskatuz, manifestazioa egin dute Bilbon.
“Ikusten genuen hazkunde ekonomikoko fase batean egonik ere pobrezia eta bazterketa gora doazela”, dio Eskubide Sozialen Kartako kide Bea Martxuetak. Honen aurrean, 2018ko martxoan abiatu zuten Babes Sozialeko Sistema Publiko eta Kalitatezko Baten Aldeko Herri Ekimen Legegilea (HEL) Gasteizko legebiltzarrean, eta urrian hura babesten duten 51.000 herritarren sinadurak aurkeztu zituen Kartak. Talde politikoek proposamena otsailean eztabaidatu eta bozkatuko dutela aurreikusten da... [+]
Eusko Jaurlaritzaren Bilboko ordezkaritza aurrean batu dira hainbat hiritar, “Gure prekarietatea, haien negozioa” lemapean. Bereziki indarkeria matxista pairatu duten emakumeak kaltetuz, Lanbidek darabiltzan praktika okerrak eta murrizketak izan dituzte jo puntu.
2015ean jo zuen goia EAEn Diru-Sarrerak Bermatzeko Errenta jasotzen dutenen kopuruak (66.373 lagunek behar zuten orduan). Ordutik, beherantz egin du kopuru horrek eta uztailean ere hala izan da: 57.377 izan dira DSBE jaso duten pertsonak, 2012 urteko kopurua berdinduz.
Diru sarrerak bermatu eta jendarte inklusiorako EAJ eta PSEk aurkezturiko Lege Proposamenak ez duela ez pobreziarekin, ez bazterketarekin, ezta Lanbideren tratu txarrekin amaituko adierazi dute plataformako kideek.
1.080 eurokoa izatea gutxieneko pentsioa. Zenbaki horretan jarria du duintasunaren marra Pentsionistak Martxan plataformak. Eta larunbat honetarako manifestazio masiboak espero dira. Marra horretatik urrunen emakumeak daude, EAEko pentsioen arrakala Espainiako handienetakoa baita. Hara zer dioten datuek:
