Laborantzaren trantsizio agroekologikoa bultzatzeko eskatu die erakundeei Egurra ta Kandelak

  • Otsailaren 16 eguerdian protesta egin dute laborari agroekologikoek Gipuzkoako Foru Aldundiaren aurrean. Azken asteetan traktoreek egin dituzten mobilizazioetatik bereizi dira: "Nekazaritza eredu neoliberalak bere mugen kontra egin du talka; eta nekazari-patronala eta bere sindikatuak ari dira mobilizatzen, Europa osoan zehar, behin betiko hondamena gertatu baino lehen, azken apurrak salbatzeko". Aldarrikatu dutenez, "eredu agroekologikoa izan da kapitalismoaren krisiak hobekien jasan dituena" eta "gertuko instituzioak" kritikatu dituzte: "Laborantza eredu industrialaren zutabeak dira". Laborantza eredua "errotik" aldatzea eskatu dute, "trantsizio agroekologikoa" bultzatzea alegia.


2024ko otsailaren 19an - 06:19

Egurra ta Kandela baserritar ekintzak deitu du mobilizazioa eta eragile hauek babestu dute: Biolur, Biziola, EHKO, Erein da jan eta Azataporrua. Gipuzkoako Aldundiaren aurrean elkarretaratzea egin dute eta hainbat kidek baratzetxo bat landatu du Gipuzkoa plazan.

Zergatik dago laborantza krisian?

Elkarretaratzean publiko egin duten irakurketan azaldu dutenez, "eredu agroindustrialak eraso egiten die bere existentzia posible egiten duten oinarri materialei: ingurumenari eta bertan bizi den herriari. Eta, gainera, berriki modu nabarmenagoan egin behar die aurre berak larriagotu dituen nahas-mahasei". Krisiaren aldagaien artean aipatu dituzte "ekonomia neoliberalaren oinarrian dauden merkataritza libreko itunak, zeintzuek sustatzen duten mundu osoko nekazarien arteko lehia gupidagabea"; bestetik, erregai fosiletan oinarritutako eredua izatea, eta horrek dakarren erregai, ongarri sintetiko eta fitosanitarioen garestitzea; baita ere aipatu dute prezioak baxu mantentzeko "inperialismo bihozgabea" burutzea, adibidez Ukrainan, Gazan, Sirian, Yemenen edo Sahelen; baita ere aipatu dute ur eskasi, "nekazari-eredua diseinatu zen ura

agortezina balitz bezala, bere erabilera edozein izanda ere"; azalera handiko supermerkatuen eta elikagaien banaketaren oligopolioa; eta klima larrialdiak zuzenean egiten dien eragina.

"Eredu agroekologikoa izan da kapitalismoaren krisiak hobekien jasan dituena"

Nabarmendu dutenez, eredu "zentzugabe horren aurrean, eredu agroekologikoa izan da kapitalismoaren krisiak hobekien jasan dituena, eta inoiz sustatu ez zuen desastre ekologikoari irtenbideak ematen jarraitzen duena". Bere onurak ekarri dituzte gogora: "Familiei lan duina eta komunitateari kalitatezko elikagaiak eskaintzen dizkieten baserri proiektuak mantenduz, bertako kontsumoa sustatzen duten zirkuitu laburrak sortzen ditu, ekoizle txikien kontsumo taldeetan edota kooperatibetan sareak josten ditu, herrietako baserritarren azokak indartzen ditu, landatutako bioaniztasuna eta bertako arrazak berreskuratzen eta gordetzen ditu. Bizitzarekiko eta ingurumenarekiko errespetutsua den abeltzaintza eta nekazaritzan errealitate egiten du".

Erakundeei kritika

Nekazaritza Politika Bateratua kritikatzen urteak daramatzatela gogoratu dute, "baina ez bere ingurumen-neurri zorrotzengatik, baizik eta erakusten duen epelkeriagatik. Baita esportaziorako nekazaritza bultzatzeagatik ere, eta mendebaldarrak ez diren herrialdeetako nekazarientzat dumping-erako tresna delako. Edota lur-jabe handien kapitala sustengatzeagatik eta gainontzekoontzat hondarrak uzteagatik".

"Gertuko instituzioen" nekazari-politikak ere kritikatu dituzte: "Gure proposamenak gutxiesten dituzten neurri berean, eredu industrialaren zutabeak dira. Ito egiten gaituzte haien eskakizun burokratikoekin. Elikagai sintetikoen industria bultzatzen dutenean, edo nekazal-megaproiektuetan diru publikoa gastatzen dutenean, nekazaritza familiarra alboratzen dute. Trantsizio Energetikoaren lege berriarekin gure mendiak ustiatzeko bideak irekiko dizkiete multinazionalei eta inbertsio- funtsei. Hainbat eskualdetan nekazaritzarako eta abeltzaintzarako geratzen diren lur-sail apurrak eureganatuko dituzte enpresa horiek eta herri txikietako bizitza agortuko da, ezinbestean".

Horrengatik guztiagatik, zera eskatu dute: "Nekazaritza eta abeltzaintza ereduak errotik aldatuko dituen trantsizio agroekologikoa. Elikagaien prezioen erregularizazioa, merkataritza libreko itunen amaiera eta janari sintetikoen debekua. Betebehar burokratikoak arindu nahi ditugu. Belaunaldi erreleboa ziurtatu. Elikadura osasuntsua izatea eskubide sozial bat da. Azken finean, gure lanarekin jarraitu nahi dugu, beranduegi izan baino lehen".

 


Kanal honetatik interesatuko zaizu: Agroekologia
2024-04-17 | ARGIA
Berangoko Otxantegiko nekazal lurren desalojoa gelditzen laguntzeko deia egin dute

Berangoko Otxantegiko nekazal lurrak modu kolektiboan lantzen bi urte eman ditu proiektu agroekologikoak, baina desalojo agindua dute apirilaren 18rako. Kanporatzea gelditzea lortu zuten iaz, eta berriro ere lortuko dutelakoan, gosari herrikoia deitu dute egun horretarako... [+]


2024-04-12 | Estitxu Eizagirre
Esti Besa, ardogintzaz
"Upategietan parakaidisten eredua nagusitu da"

Ardogintza borborka dago: mundu mailan gaineskaintza dagoela-eta, iaz milaka litro erosi zituen Jaurlaritzak destilatzeko. Espainiako Gobernuak diruz lagundu zuen mahats berdea lurrera botatzea. Aurten ere antzeko neurriak hasi dira agertzen. Baina nola iritsi gara egoera... [+]


2024-03-14 | Estitxu Eizagirre
"Amama harro legoke, nahiko luke landareetan izan genuen aberastasun horretara iristea egun gure lurra"

Onintza Enbeita bertsolaria da, kazetaria, parlamentari ohia... eta baratzezaina ere bada. Hiru ahizpek dituzte unibertsitateko ikasketak, eta duela dozena bat urte erabaki zuten etxean beti ezagutu duten baratzeari eta azokan saltzeari berriz ekitea. Mattin Jauregik Egonarria... [+]


2024-03-11 | Estitxu Eizagirre
Herritarren artean hiru hilabetean 70.000 euro lortzea du erronka Amillubi proiektuak

Amillubi proiektua iragan abenduan eman zuen ezagutzera Biolur laborantza ekologikoko elkarteak. Bere abiapuntuko helburua Gipuzkoan (Zestoako Iraeta auzoan) kokapen estrategikoa duten lur emankor batzuk ondasun kolektibo bihurtzea da, lur hauek babesteko eta bertan etorkizuneko... [+]


Eguneraketa berriak daude