Baserritar Bilgunea sindikatu berria azaroaren 1ean aurkeztuko dute jende aurrean
Laborantzako sindikatu berriak urriaren 18an egin zuen bere eratze batzarra, Lazkaoko Biziola proiektuan. Larunbata honetan gizarteari aurkeztuko diote sindikatua, "Baserri iraunkorrak, bizitza duinak" lemapean: Donostiako Gipuzkoa Plazan, 18:00etan hasita.
Baserritar Bilguneak bere burua aurkezten duen bideo hau zabaldu du:
Josebe Blanco artzain eta ARGIAko kolaboratzailea Baserritar Bilgunearen eratze batzarrean izan zen, eta sindikatuaren premiari buruzko bere hausnarketak idatzi zituen Ekaitzaren erdian artikuluan. Egonarria saioan elkarrizketatu ditugu eta azaroaren 26tik aurrera egongo da elkarrizketa ikusgai webgune honetan.
Baina sindikatu berriaren oinarriak eta aurrera begirako asmoak ezagutu nahi dituen herritarrak, azaroaren 1ean du aukera: 18:00etan emango dute prentsaurrekoa Donostiako Gipuzkoa Plazan, eta ondoren kalejira egingo dute, festa eta aldarrikapen giroan. Norberak sektorearekin lotzen dituen erreminta, arropa eta abar ekartzeko dei egin diote herritarrei.
Afixan ikusgai informazio osoa:
