Zarataren Legearen arau-hauste larriagatik, eta inguruko bizilagunei sortzen dizkien arazoengatik jarri dio isuna Barakaldoko Udalak. Oxinorte Gas-ek Udalaren zigor jakinarazpena jaso duenetik 15 egun ditu egokitzat jotzen dituen agiri eta alegazio guztiak aurkezteko.

Enpresak hiru hilabetetan zehar, iluntzeko hamarretatik goizeko zazpiak bitartean, ezingo ditu erabili zarata “jasanezina” sortzen duten fabrikako instalazioak.

Zarataren asteroko neurketak egin eta aurretiaz eskatutako dokumentazioa aztertu ondoren abiarazi da astelehen honetan prozedura. Barakaldoko Udalak zein Eusko Jaurlaritzak adostu dituzte hartu beharreko neurriak. Premiazko neurriak hartzeko mozioa osoko bilkuran onartu eta bi hilabetera hartu dute arazoari aurre egiteko erabakia.

Hala eta guztiz, Amaia del Campo Barakaldoko alkateak, onartutako prozeduraz eta isunaz gain, bigarren espediente bat irekitzeko eskatu du: “Zoritxarrez, zaratak bere horretan jarraitzen duelako eta ez delako konpondu”. Udalak ziurtatu duenez, arazo honi amaiera emateko eskura dituzten tresna juridiko eta legal guztiak erabiliko ditu.