Berria egunkariak jaso duenez, SIPE Ertzaintzaren Lanbide Sindikatuak salatu du sei agente “arrisku larrian” jarri zituztela Bilboko protestetan, eta kritikatu du ertzainak “aurreikusi zitezkeen istiluetara baliabiderik gabe” bidali izana. Protestak ez zirela baketsuak izan adierazi du sindikatuak. Eusko Jaurlaritzaren Segurtasun Sailak ohar bidez adierazi du lau agentek kolpeak jaso zituztela. Gazarako Mugimendu Globaleko kideek hainbat hedabideren jarrera ere kritikatu dute, “protestetan egon gabe” informatu dutelako eta Eusko Jaurlaritzaren Segurtasun Sailaren iturriak “errepikatu dituztelako”. EITB, Deia eta El Correo hedabideen jokaerak nabarmendu dituzte antolatzaileek.

“Ertzaintzaren aurkako erasorik ez”

Mugimenduak azaldu duenez, Bilboko elkarretaratzearen berri aldez aurretik eman zuten eta legearen arabera. Elkarretaratzearen ondoren, ekintzaile talde batek, lurrean etzanda, tranbiaren bidea eten zuen, “ekintza baketsu eta bortxarik gabekoaren” bidez. Antolatzaileen arabera, ekintza bukatutakoan protestariak espaloira erretiratu ziren, “inolako gorabeherarik gabe”. Ertzaintzak bi kideri identifikatzeko eskatu zien eta horietako batek ez zuen onartu, eta ondorioz, atxilotu egin zuten. Mugimenduak adierazi duenez, momentu horretan Ertzaintzak indarkeriaz jokatu zuen eta “bortizki tratatu zituzten” identifikatutako bi protestariak eta ingurukoak. Azpimarratu dute ez zela “inolako eraso antolaturik egon, ezta Ertzaintzaren aurkako erasorik ere”.