Izarrako herritarrek salatu zuten herriko familia bat etxegabetuko dutela. Prentsaurrekoan argitu zuten orain arte alokairuan bizi zirela eta jabeak era “arbitrarioan” akordioa aldatu zuela, familia etxetik bota nahian, “presionatzeko”. Adierazi zuten jabeak, familiaren “egoera irregularra” tarteko, horien egoera zaurgarria baliatu duela eskubideak ez bermatzeko. Lau adin txikiko dituen familiak abenduaren 18rako jaso du etxegabetze agindua, eta kale gorrian egoteko arriskuan dago.

Ez da kasualitatea familia migrante eta arrazializatuek sistema kapitalistaren ondorioak pairatzea, prentsaurrekoan salatu dutenez: “Pribilegio zuriaren ondorioz, filtro arrazistak jasan behar dituzte, ideia erreakzionario eta faxistak goraka doazen testuinguru orokor honen aterkipean”. Ohartarazi dute herriko etxebizitzaren egoera ez dela “samurra”, eta eskatu dute familia horri “alternatiba erreal” bat emateko. Dei egin dute Izarrako Plaza Berrian elkartzera abenduaren 18an 09:30etik aurrera, familiari elkartasuna adierazteko.