EAEko eskola erlijiosoetako lan gatazkan ez da akordio zantzurik nabari. Patronalak duela egun gutxi helarazi zuen azken proposamena, “gutxiegizkotzat” jo zuten sindikatuek. Berria egunkariak jakin duenez, patronalak ez du proposamen berririk aurkezteko asmorik gaurko bileran. Horrela balitz, mobilizazioekin jarraituko dutela aipatu dute sindikatuek.

Sindikatuen eskarien artean, langileen soldatak-igotzea, irakasleentzako ordu osagarriak izatea eta ikastetxe batek itxiz gero, beste eskola batean lanpostua mantentzeko hitzarmena sinatzea daude.

Eskariak “ulergarriak” diren arren, gastu horiei aurre egiteko behar bezain diru ez dagoela zehaztu du Kristau Eskolak. Mikel Ormazabal patronaleko zuzendariak adierazi duenez, “langileen erosahalmena jaistearen eta lan zama igotzearen arazoak konpontzeko, finantzazio publiko handiago behar dugu”.

Eskoletako langileek sei egunez egin dute greba dagoeneko aurtengo ikasturtean. Gurasoek kezkaturik jarraitzen dute, zenbait eskola egun airean dauden ikusita.