Jaurlaritzaren estrategia: 3.000 milioi euro, 44.000 langabe gutxiago izateko
Eusko Jaurlaritzaren Enplegu eta Gizarte Gaietako sailak atzo iragarri zuenez lau urtetan 3.000 milioi euro jarriko ditu langabezia tasa heren bat jaisteko. 2011-2014 Enplegu Estrategiaren barruan kokatu dute egitasmoa; aurrekontuaren ardatz batzuk finkaturik dauden arren, ez dute plan zehatzik aurkeztu, ekonomiaren bilakaera aldakorrak zurruntasunetik "urruntzea" behartzen baitu Administrazioa, Gemma Zabaleta sailburuaren esanetan.
Ondorioz, urtero zehaztuko dituzte burutu beharreko ekintzak eta helburuak.
Egun EAEn 129.000 lagun lan bila dabiltzala esan zuen Zabaletak –Espainiako INEren datuak haintzat hartuz– eta %12ko langabezia tasa dagoela. 2012an tasa hori puntu bat jaistea dute helburu eta 2014an %8ra jaistea da xede nagusia, 44.000 langabe gutxiago, hain zuzen.
Aitzitik, 2012rako aurreikuspen ekonomikoak nahiko ilunak dira eta langabeziak gora egingo duela iragarri dute adituek. Jaurlaritzak onartu du datorren urtean 2.900 lanpostu besterik ez dela sortuko EAEn, euren aurreikuspenen arabera. Egoera larritzen ari da, besteak beste epe luzeko langabetuak gero eta gehiago direlako; ondorioz Diru-sarrera Bermatzeko Errenta (DBE) eskaerak asko handitu dira eta Lanbideko bulegoek zailtasunak dituzte horiek guztiak aztertzeko. Garak gaur azaldu duenez aste honetan Lanbidek Gasteizen duen bulego nagusiak "pertsianak jaitsi" behar izan ditu DBEa eskatzera joan den jendea kalean utziaz.
