CCOO sindikatuaren hitzetan, "derrigor bete beharreko indizea bikoizten zuelako" baliogabetu du EAEko Auzitegi Nagusiak Bizkaiko Foru Aldundiko herri-lanetan zeladore aritzeko deialdia, hamaika lanpostutatik hamarretan (plazen %91n) eskatzen baitzuten euskarazko C1 maila. Eskakizuna "neurriz kanpokotzat" eta hortaz "diskriminatzailetzat" hartua izan dela jakinarazi du CCOO-k, plazaratutako oharrean.

Sindikatuak nabarmendu du hizkuntza eta lan eskubideak "erabat uztargarriak" direla, "proportzionaltasun linguistikoa errespetatuz gero". Eta, Eusko Jaurlaritzaren 9/2024 dekretua aintzat hartuta, Bizkaiko Foru Aldundiak nahitaez bete beharreko indizea lanpostu guztien %46,47koa dela dio, zeina baliogabetutako deialdiak nabarmen urratzen duen. CCOO-k gaineratu du euskarazko C1 titulazioa eskatzea "behin-behineko langileak baztertzea" dakarrela: "Baztertutako langileek urteak zeramatzaten lanean, aldi baterako kontratuekin, eta B1 eta B2 profil linguistikoak zituzten".