2023/2024 ikasturtetik aurrera Eusko Jaurlaritzak ez ditu sexu bereizketa egiten duten eskolak finantzatuko. Gaur egun sei dira sexuen arteko bereizketa egiten duten Jaurlaritzak itundutako ikastetxeak, eta guztiek dute Opus Deirekin lotura. Horietako lau Bizkaian daude, eta bi Gipuzkoan: Arangoya (Bilbo), Ayalde (Loiu), Munabe (Loiu), Gaztelueta (Leioa), Eskibel (Donostia) eta Erain (Irun). Eskola hauetan Lehen Hezkuntzatik aurrera bereizten dituzte ikasleak. 

Gazteluetako eskola erlijiosoan (Leioa, Bizkaia) jasandako sexu abusuak salatu zituen atzo gizon batek Eusko Legebiltzarreko batzorde batean, eta horren ostean egindako Gobernu kontseiluaren agerraldian Jokin Bildarratz Eusko Jaurlaritzako Hezkuntza sailburuak hartutako erabakiaren berri eman zuen: "Ezin da onartu generoaren arabera banatzen duten zentroak egotea, eta ez dira itunduko". Hezkuntza sailak adierazi du ikastetxe horiekin harremanetan jarri direla eta bi aldeen arteko adostasunarekin jarriko dutela neurria indarrean. 

Nafarroako Gobernuak ere astelehenean adierazi zuen Batxillergotik aurrera ez dituztela finantzatuko sexu bereizketa egiten duten ikastetxeak.