ARGIA.eus

2021eko apirilaren 21a

Isun gogorrak Euskal Tsunamiak deituta Behobia kolapsatu zuten hainbat gidariri

  • Ertzaintzak bidali dizkie isunak "Barraskilo Operazioan" egondako parte hartzaileei. 500 eta 200 euro arteko isuna izateaz gain, gidabaimeneko sei edo lau punturen galera dakarte.

Z. Oleaga @zoleaga1
2020ko otsailaren 27a
Isunetako baten irudia. Arau hauste "oso larria", 500 euro eta gidabaimeneko sei puntu.

2019ko azaroaren 12an Euskal Tsunami jaio berriak Behobiako muga kolapsatzera deitu zuen. "Barraskilo Operazioa" izena eman zion ekimenari. Herrialde Katalanetako Tsunami Democraticek antolatuta, herritarrak Jonquerako muga blokatzen ari ziren egun horietan. Ehunka gidarik erantzun zioten Euskal Tsunamiaren deialdiari, Behobiako inguruneetan kilometrotako ilarak sortu ziren eta kaosa nagusitu zen ordu batzuez.

Arau hauste “oso larriak”

Hilabeteak igarota, isunak heldu zaizkie mobilizazioan parte hartu zuten hainbat herritarrei. ARGIAk hiruren berri izan du, baina pentsatzekoa da ez direla bakarrak. Hirurak Ap8 autobidean ezarritakoak dira, Hego Euskal Herritik Ipar Euskal Herrirako noranzkoan. Isuna jaso duten biri arau hauste “larria” egozten diete: “Bidezainaren aginduei men ez egitea”. ARGIAri azaldu diotenez, ordea, ez zuten Ertzaintzaren agindu zehatzik jaso protesta bitartean. 200 euroko zigor ekonomikoarekin eta gidabaimeneko lau punturen galerarekin zigortu dituzte.

Hirugarren isuna gogorragoa da. Arau hauste “oso larria” leporatzen diote gidariari: “Trafikoan arriskua sortzea”. Gidariak ukatu egin dio ARGIAri arrisku egoerarik sortu zuenik berak –eta sortu zenik arratsalde hartan–. ARGIAko kazetariek barrutik zein kanpotik jarraitu zuten mobilizazioa eta ez zuten arrisku punturik edo unerik ikusi. Ertzaintzak eta Eusko Jaurlaritzak ere ez zuten horrelakoen berririk eman. Edonola dela, zigorra 500 eurokoa eta gidabaimeneko sei puntukoa da.

“Protesta errespetatzen dugu”

Deialdia publiko egin zen heinetik, oihartzun handia izan zuen Barraskilo Operazioak. Eusko Jaurlaritzako bozeramaile Josu Erkorekak “zirkulazio askearen eskubidea” errespetatzea eskatu zuen. Gobernuak neurririk hartuko ote zuen galdetuta, “itxaron egingo" zuela erantzun zuen. Gipuzkoako Gobernantza diputatu eta foru bozeramaile Eider Mendozak protesta egiteko eskubidea “errespetatzen” zuela adierazi zuen.

 

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Desobedientzia zibila  |  Ertzaintza

Desobedientzia zibila kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude