Israelek eta Iranek elkarri eraso egiten jarraitzen dute, geroz eta intentsitate handiagoarekin
Israelek ostiralean Irani eraso egin ostean, azken horretako lider nagusi Ali Khameneik "mendekua" iragarri zuen. Israelen erasoek dagoeneko 224 lagun hil dituzte Iranen; 23, berriz, Iranek Israelen eginikoek, horietatik zortzi igandean. Irango Parlamentuan NPT Arma Nuklearrak Ez Ugaltzeko Itunetik ateratzeko lege proposamena prestatzen ari dira.
Israelek ostiralean Irango eremu nuklearrei eta goi karguei eraso egin zienetik, bi herrialdeen arteko erasoek ez dute etenik izan. Are gehiago, droneen eta misil balistikoen bidez eginiko erasoen intentsitatea geroz eta handiagoa izaten ari da, baita horiek eragindako ondorioak ere: Hossein Kermanpour Irango Osasun Ministerioko bozeramaileak igande honetan baieztatu du ostiraletik Israelen erasoek 224 pertsona hil dituztela Iranen, gehienak Teheran hiriburuan; Israelen, berriz, Hareetz hedabideak jakinarazi du Iranek misil balistikoekin igandean eginiko azken erasoek zortzi hildako utzi dituztela, eta, horrela, guztira 23 direla hildakoak.
Israelen eta Iranen artean arma nuklearren inguruko tentsioa aspaldikoa bada ere, azken asteetan nabarmen handitu dira bien arteko mehatxuak. Izan ere, Israelek ostiraleko erasoa ez zuen edozein testuingurutan egin: AEBak Iranekin negoziatzen ari dira honek uranioa aberasteko bere programa nuklearra albora dezan, eta oraindik akordio batera heltzeko aurreikuspenak urruti bazeuden ere, bi herrialdeak negoziazioen seigarren saioa egitekoak ziren igandean, Omanen. Marco Rubio AEBetako Estatu idazkariak ohar batean adierazi zuen ostiralekoa "Israelen aldebakarreko erasoa" izan zela, baina Donald Trump AEBetako presidenteak ez zuen Irani eraso egiteko aukera baztertu biek dituzten negozioazioek aurrera jarraitzen ez badute.
Iranen aurka eginiko lehen aire erasoan Israelek dozenaka helburu nuklear eta militar izan zituen jopuntu, baita gune horietako buru diren pertsonak ere. Besteak beste, Guardia Iraultzaileko buru Hossein Salami jenerala eta hainbat ingeniari hil zituzten. Horren aurrean, Irango lider nagusi Ali Khameneik "mendekua" iragarri zuen, eta hala berretsi zuten: ostiralean bertan 100 drone eta dozenaka misil jaurti zituzten Israelera, batez ere Tel Avivera, eta hango aire defentsak gehienak suntsitzea lortu bazituen ere, hainbat misil balistikok talka egitea lortu zuten, esaterako, Israelgo Defentsa ministerioaren egoitzarekin.
Su-eten baterako itxaropenak, urruti
Ostiralaz geroztik, bi herrialdeek bakoitzaren gune nuklearrei eta militarrei eraso egiten jarraitu dute, baita herritarrak bizi diren hainbat eremuei ere. Erasoak ez dira soilik Tel Aviv eta Teheran hiriburuetan gertatu. Esaterako, larunbatetik igandera bitartean Iranek jaurtitako misil balistikoek Israelgo kostaldeko Haifa hiria izan zuten jopuntu, bertan baitago herrialdeko petrolioa fintzeko azpiegiturarik handiena. Eta Israelgo ehiza hegazkinek behin eta berriz eraso egin diete Irango Natanz, Isfahan edota Fordow bezalako eremu nuklearrei.
Europako hainbat agintarik gatazkaren inguruko adierazpenak egin dituzte. Emmanuel Macron Frantziako presidenteak larunbatean Irani leporatu zion gatazka abiatzea, eta "beharrezkoa balitz Israelen defentsan" parte hartuko zuela adierazi zuen: "Ezin gara Iranek arma nuklear bat duen mundu batean bizi". Friedrich Merz Alemaniako kantzilerrak Irani Israelen aurkako erasoak etetea exijitu dio.
Iran NPTtik ateratzeko lege proposamena
NPT Arma Nuklearrak Ez Ugaltzeko Itunaren kide da Iran, NBEren ekimenez sortua eta IAEA Energia Atomikoaren Nazioarteko Agentziak ikuskatzen duena. Itunaren bidez, haren parte den edozein herrialderen uranioa aberasteko programaren gaineko kontrola du IAEAk, suntsipen handiko armen eta arma nuklearren gehiegizko garapena galarazteko helburuarekin. Bada, Irango Atzerri Ministerioko bozeramailea den Esmaeil Baghaeik zera iragarri du astelehenean: Irango Parlamentuan NPT-tik irteteko lege proposamena prestatzen ari direla.
Mingainari kosk txikia eginda joan ginen oporretan Kanarietako Lanzarote irlara. Maiatzaren erdian, turista asko-askorik topatuko ez genuela jakinda, prezio guztiak ere merkeago, eta hara eta hona mugitzeko lasaitasun gehiago. Espero bezalaxe izan zen. “Esperientzia”... [+]
CAFek urteroko akziodunen batzarra egin duen egun berean, Jerusalemgo trenaren martxan duen tren proiektua bertan behera uztea exijitu diote Donostian eginiko manifestazioan. Amnesty Internationalek hitza hartu du tren ekoizlearen akziodunen batzarrean, eta Israelen "legez... [+]
Egiptoko Poliziak militante ugari atxilotu ditu ostiralean, eta hainbat zauritu eragin, protesta oztopatzeko saiakeratan. Nazioarteko martxaren antolatzaileek adierazi dute aurrera jarraituko dutela, eta datozen orduetan erabakiko dituzte hurrengo pauso zehatzak.
Asteartean pasa zuten Tunisia eta Libiaren arteko muga, ondotik Egiptora sartu eta bertatik Gazara heltzeko asmoz. Berez, Libiako autoritateen babesa jasota du ekimenak, eta jarrera horri segika bidea berriz irekitzea galdetu diete poliziei antolatzaileek.
Israelek Iranen aurka orain arte egindako aire eraso gogorrena egin du ostiral goizaldean, Leon operazioa-rekin. Erasoan, Israelgo Armadako 200 bat gerra hegazkinek hartu dute parte eta kalte handiak eragin dituzte Iraneko nuklear programa garatzeko eta misil balistikoak... [+]
Gazarako Martxara bidean, Kairoko aireportuan atxilotu zituzten euskal herritarren artean dago Agus Gorbea, eta momentuz deportatu duten bakarra izan da. Euskal Herrira bidean dagoela erantzun ditu ARGIAren galderak.
Palestinako herria pairatzen ari den genozidioa salatzeko bi eguneko baraualdia egingo du Argituz elkarteak Donostian asteburu honetan, larunbatean eta igandean. Garibai kaleko 19. zenbakian egingo dute elkartasun ekintza.
Espainiako Estatuak eta Palestinak bultzatuta, 146 herrialdek alde bozkatu dute, 12k kontra eta 19 abstenitu dira. Ebazpenak Gazako sarraskia eta Israelen hedapena Zisjordanian salatu ditu eta nazioarteko ebazpen judizialak betetzea eskatu.
Egiptoko Gobernuak Israelen presioei men egin eta ehunka pertsona atxilotu ditu, Gazara egitekoa den martxa gelditu nahian. Hala ere, milaka lagunek martxari hasiera emateko prest jarraitzen dute, Israelen blokeoa apurtu eta genozidioa gelditzeko presioa egin asmoz. Melisa... [+]
Dagoeneko 30 hiri inguru batu dira politika migratorioen eta militarizazioaren aurkako protestetara eta larunbaterako 1.800 hiritan dituzte protestak deituta. Los Angelesen egin bezala, hiri horiek ere militarizatzeko xedea aipatu du Trumpek. Guardia Nazionala hedatu dute... [+]
Kairoko hotel batetik hitz egin du ARGIArekin ostegun goizean Pili Revilla gasteiztarrak. “Edozein momentutan atxilotu gaitzakete”, adierazi du. Solasaldiaren unean Euskal Herritik joandako bost herritar daude atxilotuta, eta nazioarteko dozenaka. Arreta Palestinako... [+]
Ekainaren 13an hasi behar duen Gazarako Martxako partaideak atxilotzen ari da Egiptoko Polizia, tartean hainbat euskaldun. Israel Gazan egiten ari den sarraskia salatu eta korridore humanitario bat ireki dadila eskatzeko abiatu dute ekimena mundu osoko 3.000 herritarrek.
