Igor González Sola euskal preso politikoa hil da Martuteneko espetxean
Bere ziegan aurkitu dute hilotz ostiral goizean. Martxoan bete zituen zigorraren hiru laurdenak, eta ordutik kalean behar luke. Sarek eta Bakearen Artisauek mobilizatzera deitu dute igandean Baionan eta Bilbon.
Igor Gonzalez Sola Bilboko euskal preso politikoa hilik topatu dute Martuteneko kartzelan. Espetxeko iturrien arabera, goizean aurkitu dute gorpua bere ziegan. Gonzálezek 47 urte zituen. 2005ean atxilotu zuten dokumentuak faltsutzea eta armak gordetzea leporatuta. Inkomunikazio aldian torturak jasan zituela salatu zuen. Hainbat espetxetan igaro du bere zigorraldia, besteak beste Puerto de Santa Marian, Badajozen, Valdemoron, Sorian eta Martutenen. Bere buruaz beste egiten saiatu zen bi alditan, 2008. eta 2009. urteetan. 20 urteko kondena betetzen ari zen, martxoan bete zituen zigorraren hiru laurdenak eta, horregatik, Espainiako legediaren arabera kalean egon zitekeen. Uztailean lekualdatu zuten Soriako espetxetik Martutenekora.
Igandean manifestazioak
Sare herritarrak eta Bakearen Artisauak mobilizazioak antolatu dituzte igandean eguerdiko 12:00etan, Gonzálezen heriotza salatzeko. Sarek Bilbora deitu ditu herritarrak, eta Bakearen Artisauak Baionara.
🗓️IRAILAK 6 SEPTEMBRE
⏰12:00
📌Consulat d'Espagne - BAIONA pic.twitter.com/MElEqvTUNR
— Artisans de la Paix #OrainPresoak (@Artisans_Paix) September 4, 2020
.jpg)
