Irailaren 10ean, Palestinako herriaren aldarrikapen historikoa jasoz, 11 etapako martxa bati ekin zioten Tuteran, Ebro ibaitik Kantauri itsasora Palestinaren askatasunaren aldeko aldarria eramateko asmoz. Martxa Hendaian amaitu da salaketa argi batekin: Israelgo Gobernua sistema kolonialista apartheidaren bidez mantentzen da, eta hori nazioarteko konplizitateei esker egiten du, zazpi hamarkadaz askatasuna eta nortasuna defendatzen ari den herri baten aurka.

“11 egun hauetan zehar, milaka pertsonak parte hartu dute mobilizazio herritar honetan, mezu argi batekin: Palestinako herriak bizi duen egoera genozidioa da eta ezin da inpunitatean geratu”, zehaztu dute antolatzaileek.

Etapa bakoitzaren antolaketan parte hartutako jendearen kopurua goraipatu dute, eta martxaren “dimentsio emozional handia” azpimarratu dute. “Bihotz ederrak elkarrekin oinez, tarte txiki bat besterik ez bazen ere, konpromisoaren eta itxaropen partekatuaren adierazpen izan da”.

11 etapak amaituta, erronka energia kolektibo hori kanalizatzen jarraitzea dela uste dute, konplizitateak hausteko, Israelgo Gobernu sionista isolatzeko eta Palestinako herriaren eskubideak betearazteko. “Borrokak jarraitzen du. Aktibatu eta babestu boikot akademiko, kirol eta kulturala Israelgo Gobernu genozida ordezkatzen duen edonorentzat. Aldi berean, exijitzen diogu gobernuari Israelgo Gobernu genozidarekin duen harreman oro berehala eta osotasunean eteteko".