2022ko lehen seihilekoan 37 andrek erabili dute Eusko Jaurlaritzaren SATEVI Emakumeen Aurkako Indarkeriaren Biktimentzako doako telefono zerbitzua (016 edo 900 840 111), Agintzari Jaurlaritzaren Gizarte Ekimeneko Kooperatibak eginiko txosten baten arabera. Iaz 20 emakumek jo zuten arreta bila, alegia, aurten ia bikoiztu egin da kopurua.

Txostenean jaso dutenez, kasu gehienetan erasotzailea gertuko ezaguna izan da: bikotekidea, bikotekide ohia, lankidea, sendagilea, eta abar. SATEVIren arreta jaso duten kasu guztiak izan dira sexu askatasunaren aurkako delituren bati lotutakoak, hau da, hala nola sexu erasoa, prostituzioa, sexu abusua, exhibizionismoa, sexu jazarpena eta adin txikikoen sexu esplotazioa barnebiltzen dituen delituren bat.

“Dei hazkuntza bat egoteak ez du esan nahi erasoek bat-batean hazkuntza bat izan dutela”, argitu du Eitb-n Nahiara Burgoa SATEVIko gizarte langileak: “Guk pentsatzen duguna da gero eta gehiago berba egiten dela honi buruz, gero eta kontzientziazio handiagoa dagoela, eta erraztasun gehiago dagoela salatzeko”. Festako testuinguruari dagokionez, Burgoak zehaztu du erasoak egiteko modua aldatzen doala baina erasoa beti emakumeen aurkakoa dela: “Beti ipintzen da fokua emakumeengan, kontuz edalontziarekin-eta, eta fokua erasotzaileengan ipini behar da”.

Txostenean jaso dutenez, ziztaden moduko erasoek eragiten dute emakumeak “etengabeko alerta egoeran” egotea: “Izaera matxista argia duten kasu hauek beldurra eragin eta emakumeei sexu-izuaren politikaren bidez jasan lezaketen eraso eta arriskuen erantzule egiteko helburua dute”. SATEVIk azaldu du sentsibilizazio kanpainekin segitu behar dela horri aurre egiteko.