ARGIA.eus

2020ko urriaren 01a

Hezkuntza greba abian da, ohi baino gutxieneko zerbitzu gehiagorekin

  • Goizeko 11:00etan mobilizazioak egin dituzte EAEko hiru hiriburuetan, eta sindikatuen lehen zenbaketen arabera jarraipena %65ekoa izan da. Gutxieneko zerbitzuak igoaz greba desaktibatzen ahalegindu izana leporatu diote sindikatuek Eusko Jaurlaritzari.

ARGIA @argia
2020ko irailaren 15a
(Argazkia: Ecuador Etxea)

“Gure ikastetxeetan aurrez aurreko itzulera segurua eta adostua” leloak hartu ditu asteartean EAEko kaleak. ELA, LAB, Steilas, CCOO eta UGT sindikatuek deitutako hezkuntza grebak ikasgeletara itzulera “segurua eta adostua” exijitzea du xede. Izan ere, greba deialdia egitean salatu zutenez, Eusko Jaurlaritzak ikastetxeetara buelta langileak kontuan hartu gabe eta neurri aski hartu gabe egin du.

Grebak hezkuntza sare publikoa zein itunpekoa barne biltzen ditu, eta deialdiarekin bat egin dute hezkuntza arloko azpikontratek ere. Hala, etenak garraio, jantoki eta garbiketa zerbitzuei ere eragingo die.

Goizeko 11:00etan mobilizazioak egin dituzte EAEko hiru hiriburuetan. Gasteizen Jesus Guridi Kontserbatorio Parketik abiatu da, Bilbon Arriagatik eta Donostian Alderdi Ederretik. Ordu berean egin ditu mobilizazioak Ikasle Abertzaleakek ere, baina abiapuntu ezberdinetatik. “Ondorioak ez ditzala langile klaseak ordaindu” lelopean, ikasle antolakundearen manifestazioak ondoko tokietatik abiatu dira: Donostian, Ibaetako aulariotik; Bilbon Sarrikotik; eta Gasteizen Elurretatik. Sindikatuen lehen zenbaketen arabera, grebak %65eko jarraipena izan du. Eusko Jaurlaritzak parte hartze baxuagoagoa zenbatu du, %45eko, hain zuzen ere.

Aurrekoetan baino gutxieneko zerbitzu gehiago

Astelehenean eman zuen argitara Eusko Jaurlaritzak greba egunerako gutxieneko zerbitzuen agindua, zeinaren bidez aurreko grebetan baino gutxiengo zerbitzu gehiago ezartzen ziren. Besteren artean, jantoki zerbitzua bermatu beharra eta garbiketa alorrean %100eko gutxiengo zerbitzuak xedatu zituen.

Sindikatuek ohar bateratu batez bidez salatu dute agindua, eta gutxieneko zerbitzuak igoaz greba desaktibatzeko nahia izan duela leporatu diote Jaurlaritzari. Jaurlaritzak neurriokin “babesa eta segurtasuna bermatzeko” asmoa duela esan arren, hori “aitzakia” dela azpimarratu dute, eta arrazoia beste bat dela seinalatu: greba indargabetzea. “Hezkuntza Sailaren kudeaketa tamalgarria eta izandako utzikeria ezkutatuz, mobilizazioa ikusezin egiteko eta greba desaktibatzeko saiakera bat da”, egin dute irakurketa. Ezarritako zerbitzuak greba eskubidearen aurka egiten dutela iritzirik, hezkuntzako sindikatuek azaldu dute epaitegietara jotzeko aukera aztertzen ari direla.

Urkulluren eskaria: greba deialdia berriro aztertzea

Greba egunaren bezperan, EHUren ikasturte hasierako ekitaldian, greba egitea birpentsatzeko eskatu zuen Iñigo Urkulluk. Bere hitzetan, grebak “tentsioa eta segurtasunik eza soilik ekartzen ditu, eta orain lasaitasuna eta segurtasuna bermatzea tokatzen zaigu”.

Igande gauez ETB2n egin zioten elkarrizketa batean egindako adierazpenen arabera, bere ustez sindikatuen asmoa kritika politikoa egitea eta orain gutxi osatutako Jaurlaritza tenkatzea da.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Hezkuntza  |  ELA  |  LAB  |  UGT  |  CCOO  |  Eusko Jaurlaritza  |  EAE  |  STEILAS  |  Covid-19 shockean adi

Hezkuntza kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude