Israelek nazioarteko uretan bahitu eta bere herrialdera eraman ostean, zenbait egunez atxilo egon diren euskal herritarrak etxean dira: Jotas Osés, Itziar Moreno, Mikel Zuloaga eta Abdel Karim el Khamlichi. Loiuko aireportuan harrera beroa egin diete dozenaka lagun eta kidek, nabarmen hunkituta iritsi diren ekintzaileei.

Nazioarteko beste ehunka ekintzailek bezala, aireportuan salatu dute kolpeak jaso dituztela, umiliazioak, loa galarazi dietela, zelda txikietan pilatuta izan dituztela, janaria eta ura ukatu dizkietela, arma eta zakurrekin mehatxatu dituztela, inkomunikatuta izan dituztela eta osasun sorospena ukatu dietela. Hala ere, fokua Gazan jarri behar dela gogorarazi dute.

Flotillako kide Itziar Morenok Loiura iristean, hedabideen aurrean adierazi du: "Ordua da Israelekin harreman ekonomiko, kultural, politiko, akademiko edo kirol arloko guztiak eteteko, Gazako bake prozesua engainua baita". Salatu du palestinarrek lasai lo egin ezin duten bitartean, "Euskal Herrian batzuk holokaustoaren ekonomiarekin aberasten" ari direla.

Ikusi aireportura heldu diren unea bideoan.

Jarraian zenbait argazki, Bilbo-Palestinaren eskutik.