Sexu erasoen salaketak %16,7 gehiago izan dira Araba, Bizkaia eta Gipuzkoan, aurtengo lehen 11 hilabeteetan. Emakundek argitaratu ditu datuok ostegunean, eta iazko lehen 11 hilabeterekin alderatuta, emakumeen aurkako indarkeriaren salaketak %8 ugaritu dira. Nabarmen hazi direnak sexu erasoengatik jarritako salaketak izan dira: 683 orotara.

Bikotekide edo bikotekide ohiek eraso matxistak egin dizkietelako salaketak aurkeztu dituzte 3.554 emakumek, 2023an baino %5 gehiago (3.383 izan ziren). Gainera, familia barrukoek edo gertuko pertsonek egindako 975 eraso matxista salatu dituzte emakumeek, iaz epe berean baino %13 gehiago. Azpimarratzekoa da 2024an gutxienez sei andre hil dituztela Euskal Herrian, indarkeria matxistagatik.